Grekët i përgjigjen Gjermanisë për krizën: Pse nuk i shisni ishujt tuaj të falimentuar?

27 Nëntor 2023, 12:22, Kosova & Bota CNA

Grekët i përgjigjen Gjermanisë për krizën: Pse nuk i

Foto ilustruese

Në një artikull të botuar në gjermanen "Bild", korrespondetja e Greqisë, Liana Spyropoulou, ka sjellë zërin e një serë politikanësh grekë për krizën e ekonomisë që tashmë ka prekur Gjermaninë. Përmes politikanëve, ajo i ka kthyer përgjigjen Gjermanisë për këshillat që këta të fundit i dhanë Greqisë teksa ajo përjetonte krizën ekonomike.

"Kur grekët falimentuan në vitin 2010, nuk mungoi këshilla jonë e mirë: “Shisni ishujt, ju grekë të falimentuar”, ishte titulli i "BILD" në atë kohë dhe e kishim seriozisht!"- shkruan Spyropoulou.

Artikulli të cilit i referohet shkrimi

Ajo shkruan se tani po e kthejnë topin, pikërisht ata që supozohej të shisnin termocentralet dhe kompanitë në kulmin e krizës së borxheve, ku Athina mendohej se kishte zhytur të gjithë Evropën duke iu referuar kështu Panagiotis Lafazanis, ish-ministër i Energjisë dhe Mjedisit në qeverinë e kryeministrit të ekstremit të majtë, Alexis Tsipras dhe ministrit të tij të egër të Financave, Yanis Varoufakis.

Tani ata po kundërpërgjigjen, madje kanë edhe disa sugjerime kursimi për ne: “Qeveria duhet të vendosë taksa emergjente si për qytetarët, ashtu edhe për kompanitë, për të zgjidhur problemin. Kjo do të shkaktojë një krizë në Gjermani, por paratë nuk mund të mblidhen ndryshe”.

Dhe më pas, grekët shpërthejnë me çekiçin e masave shtrënguese: “Një zgjidhje tjetër do të ishte shitja e aseteve publike si ishujt, në mënyrë që të mblidhen shpejt shuma të mëdha parash”.- shkruan gazetarja.

Ajo ironizon duke thënë se Gjermania e falimentuar do të duhet të shesë ishujt e saj, Helgoland, Ruegen apo Wangerooge, por a është e mundur kjo?

"A jemi vërtet kaq të falimentuar si Greqia dikur, aq sa ministri i Financave, Christian Lindner, duhet të shesë ishullin e tij me diell, Sylt?Shteti duhet të shesë edhe kompanitë, thotë e majta greke. Por, kush do ta merrte Deutsche Bummelbahn? Dhe pastaj, grekët na kërcënojnë me komisarët e masave shtrënguese.

Në Greqi, Trojka, një treshe e përbërë nga Fondi Monetar Ndërkombëtar, Banka Botërore dhe BE, dikur udhëhoqi një regjim me masa të rrepta shtrënguese. Trojka e urryer ruante arkat bosh greke. Në fund u mblodhën 278 miliardë euro ndihma për të shpëtuar perandorinë e pasur me ishuj.

Ish-ministri Lafazanis, thotë për "BILD": “Nëse gjermanët nuk mund ta vendosin vetë situatën nën kontroll, atëherë duhet të vendosen nën mbikëqyrjen e Trojkës. Pastaj do jenë të detyruar”.

Komenti i tij për situatën gjermane ishte: “Jeta është hakmarrëse. Gjermania duhet të përjetojë atë që i imponoi Greqisë. Gjermania kërcënon ta çojë Evropën në një krizë afatgjatë”.- thuhet në artikull.

Duke sjellë shembuj për disa thënie greke që qarkullojnë nga Sparta e dikurshme gazetarja e mbyll shkrimin me një këshillë për gjermanët:

"Gatishmëria për të hequr dorë dhe për të sakrifikuar qytetarët e Spartës së lashtë vazhdon edhe kësaj dite në fjalën ‘spartane’. Dhe gjërat po bëhen spartane në Gjermani.

Prandaj vjen këshilla greke nga Sparta: Nisni kursimin!" -shkruan gazetarja në artikull./CNA