web counter
LEXO PA REKLAMA!

SHKARKO APP

App Store
Google Play

E fundit!

x

Incidentet e 2023-shit në veri të Kosovës/ NATO pret llogaridhënie nga Serbia

22 Maj 2026, 14:40, Kosova & Bota CNA

Incidentet e 2023-shit në veri të Kosovës/ NATO pret

Zëvendësndihmëssekretari i përgjithshëm për partneritet i Aleancës veriatlantike, NATO, Kevin Hamilton, tha se NATO nuk mund të ketë partneritet të thelluar me Serbinë për sa kohë që Serbia nuk i mban përgjegjës organizatorët dhe autorët e sulmeve në veri të Kosovës që ndodhën në vitin 2023.

Në këtë linjë, tha zyrtari i lartë i NATO-s, "thellimi i partneritetit me Serbinë mbetet i pezulluar” dhe këtë mesazh, siç tha, "ua ka përcjellë edhe udhëheqësve shtetërorë në Beograd”. Këto komente, Kevin Hamilton i bëri në një takim me gazetarë pas dy ditësh qëndrimi në Kosovë, ku takoi, pos udhëheqësve të KFOR-it, edhe kryeministrin në detyrë, Albin Kurti.

Çfarë pezullohet për Serbinë?

"Këto incidente si dhe sulmet mbi personelin e KFOR-it ishin plotësisht të papranueshme. Unë isha në Beograd para se të vija në Prishtinë dhe mesazhi im për autoritetet serbe është që NATO pret llogaridhënie dhe drejtësi ndaj atyre që kryen dhe organizuan ato sulme, duhet të sillen para drejtësisë”, tha Hamilton, duke shtuar se "Aleanca veriatlantike do që të ketë raport transparent e pozitiv me Serbinë. Ky është mesazhi që ua dhashë bashkëbiseduesve të mi serbë”. 

Në Banjskë të Zveçanit, grupe serbësh të armatosur në shtator të vitit 2023 sulmuan Policinë e Kosovës dhe vranë një rreshter e plagosën dy të tjerë. Vetëm katër muaj më parë, në po të njëjtin vit, më 29 maj, gjatë protestave të serbëve në veri u plagosën dhe u lënduan mbi 90 pjesëtarë të KFOR-it.

Për këto ngjarje, tha zyrtari i lartë i NATO-s, duhet të ketë llogaridhënie dhe se me Serbinë nuk do të ketë "partneritet të përshtatur individual”.

"Ajo që pezullohet është thellimi i marrëdhënieve mes NATO-s dhe Serbisë, për shembull lëvizja drejt një partneriteti të përshtatur individual. Do të donim ta shihnim këtë, por nuk do të lëvizim në këto aspekte të bashkëpunimit praktik pa pasur ose deri kur të ketë llogaridhënie e drejtësi lidhur me incidentet e 2023-ës”, tha Hamilton.

Zyrtari i lartë i Aleancës veriatlantike tha se NATO ka pasur marrëdhënie të mira me Kosovën për mbi 27 vjet dhe kjo marrëdhënie është e fortë.

Zëvendësndihmëssekretari i përgjithshëm për partneritet i Aleancës veriatlantike NATO, Kevin Hamilton, që është edhe përfaqësues special për rajonin e Kaukazit dhe Azisë Qendrore, tha se "fuqi të huaja dhe qëllimkëqija po përdorin dezinformimin në dëm të sigurisë së Kosovës”.

Hamilton përmend fushata dezinformuese nga Rusia

"Fatkeqësisht ne gjithnjë shohim aktorë të huaj dhe këtu do ta përmend Rusinë, që përfshihet në fushata të dezinformimit. Këto fushata hibride janë këtu jo vetëm në Ballkanin Perëndimor, por edhe gjithandej në botë. Kjo është pjesë e manualit rus të nxisë pakënaqësi dhe përçarje edhe këtu në Ballkanin Perëndimor, prandaj është me rëndësi që njerëzit në Kosovë, por edhe në rajon, të jenë vigjilentë”, tha Hamilton.

Zyrtari i lartë i NATO-s në takim me kryeministrin në detyrë Albin Kurti, sipas këtij të fundit, është interesuar edhe për nismën e fundit të Qeverisë së Kosovës për themelimin e xhandarmërisë së Kosovës. Sipas kryeministrit Kurti, kjo strukturë, pra xhandarmëria, synon "forcimin e sigurisë në koordinim me KFOR-in dhe NATO-n”.

Themelimin e grupit punues që do të bëjë "analizimin dhe propozimin e modaliteteve për funksionimin e Xhandarmërisë së Republikës së Kosovës, si Agjencion i Ministrisë së Punëve të Brendshme”, tashmë e ka bërë të ditur ministri i Punëve të Brendshme, Xhelal Sveçla.

"Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufijve, integritetit dhe sovranitetit tonë territorial, mbrojtjen nga terrorizmi, menaxhimin e trazirave me rrezikshmëri të lartë dhe mbrojtjen e infrastrukturës kritike”, ka njoftuar Sveçla.

Sipas tij, Xhandarmëria e Republikës së Kosovës do të forcojë ndjeshëm kapacitetin shtetëror për parandalim, menaxhim dhe neutralizim të kërcënimeve që cenojnë sigurinë e qytetarëve dhe integritetin territorial të Kosovës. /DW





Lajmet e fundit nga