E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Australia legalizon drogërat psikedelike për përdorim mjekësor

19 Shkurt 2023, 10:50, Kosova & Bota CNA

Australia legalizon drogërat psikedelike për përdorim

Enti për Mbikëqyrjen e Drogave në Australi njoftoi se së shpejti do të lejohet përdorimi i substancave psikedelike MDMA dhe psilocybin - të njohura më tepër si ecstasy dhe kërpudha magjike - për trajtimin e depresioneve dhe stresit posttraumatik.

Mjekëve psikiatër do t'u lejohet t'u japin pacientëve të tyre me recetë dy substancat psikedelike duke filluar nga korriku 2023, njoftoi Enti i Prodhimeve Terapeutike, i cili ka gjetur "prova të mjaftueshme për përfitimet e mundshme të tyre ndër pacientë të caktuar".

Australia legalizon drogërat psikedelike për përdorim

Të dyja drogat konsiderohen aktualisht si "substanca të ndaluara" dhe mund të përdoren vetëm në prova klinike të kontrolluara me rreptësi. Enti i Prodhimeve Terapeutike tha se ato janë "relativisht të sigurta" kur u jepen pacientëve në mjedis mjekësor dhe mundësojnë një "ndryshim të gjendjes së ndërgjegjes" që mund t'u ndihmojë pacientëve.

Vendim i shumëpritur

Mike Musker, studiues i shëndetit mendor dhe parandalimit të vetëvrasjeve në Universitetin e Australisë Jugore, e përshëndeti këtë vendim duke e quajtur "të shumëpritur".

"Ka shumë njerëz që përjetojnë PTSD (çrregullime stresi posttraumatik) dhe depresione, veçanërisht veteranët e ushtrisë dhe njerëzit që kanë punuar në shërbimet e urgjencës, ku ilaçet standarde psikiatrike nuk funksionojnë dhe nuk ofrojnë lehtësim," tha ai. Musker tha se të dyja ilaçet "zvogëlojnë frenimet" dhe mund t'u ndihmojnë njerëzve të përpunojnë imazhe dhe kujtime të vështira.

Australia legalizon drogërat psikedelike për përdorim

Tani për tani përdorimi i MDMA dhe i psilocybinës do të kufizohet në trajtimin e depresioneve dhe të stresit posttraumatik. Por përkrahësit e këtyre substancave shpresojnë që një ditë mund t'i përdorin edhe për të kuruar varësinë nga alkooli, çrregullimet obsesive-kompulsive dhe çrregullimet e të ngrënit.

Substancat psikodelike janë përdorur nga popujt indigjenë për mijëvjeçarë me radhë, por studiuesit perëndimorë filluan të merren seriozisht me shqyrtimin e përdorimeve të mundshme të tyre vetëm në mesin e shekullit të kaluar.

Kanadaja dhe SHBA-ja janë ndër vendet që kanë lejuar tashmë përdorimin mjekësor të MDMA dhe të psilocybinës./ DW