15-vjetori i Pavarësisë/ Presidentja Osmani: Të punojmë bashkë për forcimin e Kosovës

17 Shkurt 2023, 12:46, Kosova & Bota CNA

15-vjetori i Pavarësisë/ Presidentja Osmani: Të punojmë

Presidentja e Kosovës, gjatë seancës solemne në Kuvend për nder të Ditës së Pavarësisë, kërkoi nga politika që të dominojë interesi i shtetit. Presidentja gjithashtu kërkoi nga ndërkombëtarët që vendet e Ballkanit Perëndimor të jenë pjesë e NATO-s.

Osmani shprehu mirënjohje për dëshmorët e UÇK-së, ish-presidentin Rugova, ushtarët e FSK-së, Adem Jasharin dhe aleatët ndërkombëtarë për çlirimin e Kosovës.

Presidentja tha se duhet punuar bashkë dhe pa reshtur që shtetin dhe Republikën e Kosovës të forcojmë.

“Këto sfida na kanë bërë që të përplasemi për brenda, pasi kemi pikëpamje të ndryshme. Si gjithnjë do të jemi një, prandaj pavarësisht dallimeve në pikëpamje politike, spektri politik do të dominojë në interes të vendit. Ne jemi fuqishëm në anën e aleatëve tanë, vendet e Ballkanit Perëndimor, ato që janë demokratike sa më shpejt të anëtarësohen në NATO. Prandaj le të punojmë bashkë edhe pa reshtur që shtetin dhe Republikën e Kosovës ta forcojmë. Zoti e bekoftë Republikën e Kosovës, Zoti i bekoftë qytetarët e Kosovës. Qëndresën e pashembullt të brezave të lirisë, e cila i parapriu jetësimit të ëndrrës së madhe, presidentit historik, dr. Ibrahim Rugova, i cili e siguroi respektin e gjithë botës demokratike. Bijat tona në UÇK që sakrifikuan jetën në mbrojtje të vendit, komandantin Adem Jashari, i cili i priu rezistencës për liri, përfaqësuesit e shtetit, të cilët për 15 vite kontribuuan për jetësimin demokratik të vendit, ushtarëve e policisë sonë, ushtarët e FSK-së që po luftojnë për shpëtimin e jetëve nga tërmetet në Turqi e Siri. U falënderohemi edhe miqve tanë, aleatëve tanë, të cilët i kemi quajtur me të drejtë shpëtimtarë e miq të lirisë, kur ne ishim të shtypur e luftonim për lirinë, kur u çliruan në tokën e lirë, ata janë këtu edhe sot, partnerë të besueshëm e të qëndrueshëm më të cilët edhe sot po e ndërtojmë të ardhmen tonë”, tha Osmani.

Osmani tha se në këto 15 vjet shtet Kosova është zhvilluar e forcuar si shet i ri, si nga ana politike, ashtu edhe në funksionimin e institucioneve.

“Institucionet po forcohen e kjo është arritje e madhe. Sfidat kanë qenë të pashmangshme, por i kemi tejkaluar me aleatët tanë, këto sfida na kanë bërë të kemi përplasje të brendshme, por na kanë bërë edhe më të fortë, kanë dëshmuar aftësinë tonë për të qenë më të qëndrueshëm karshi tyre. Këto sfida janë të pranishme edhe sot kur Kosova falë përcaktimit të saj të hershëm po përpiqet të përcaktojë pozitën e saj drejt strukturave euroatlantike në NATO”, tha Osmani.