web counter
LEXO PA REKLAMA!

SHKARKO APP

App Store
Google Play

E fundit!

x

Abdixhiku jep dorëheqjen: Më shumë se kaq nuk kam çfarë të ofroj

14 Janar 2026, 22:35, Kosova & Bota CNA

Abdixhiku jep dorëheqjen: Më shumë se kaq nuk kam

Kryetari i Lidhjes Demokratike të Kosovës, Lumir Abdixhiku, ka deklaruar se ka ofruar dorëheqjen e tij nga posti i kryetarit, duke e cilësuar këtë si hapin më moral dhe më të përgjegjshëm që mund të ndërmarrë një politikan.

Pas një diskutimi që zgjati mbi pesë orë, Abdixhiku tha se vendimi i shpallur nuk përfaqëson mendimin e tij personal, por vullnetin e shumicës dërmuese brenda partisë. Ai theksoi se LDK nuk i shmanget përgjegjësisë dhe se reflektimi është i domosdoshëm.

Ai theksoi se nuk është i lidhur pas pozitës, por pas partisë, duke nënvizuar se eliminimet politike nuk mund të bëhen individualisht, por vetëm përmes vendimit të anëtarësisë.

Deklarata e Lumir Abdixhikut

Më shumë se dorëheqja nuk kam çfarë të ofroj!

Kam dëgjuar dhe jemi dëgjuar me njëri-tjetrin me vëmendje. Çdo zë, çdo kritikë dhe çdo shqetësim, me orë të tëra. Pesë orë e gjysmë. Në fund kemi dalur me përgjegjësi të plotë dhe me dinjitet para qytetarëve për të shprehur jo mendimin e një individi, as timin, por të shumicës dërmuese, ashtu siç u pajtuam pas pesë orë diskutimi.

Nuk i shmangemi asnjë përgjegjësie dhe nuk i ikim asnjë reflektimi. Unë, edhe më pak.

Kam marrë hapin më moral që një kryetar mund ta marrë: kam ofruar dorëheqjen time. Kam hapur rrugën për secilin që ka pretendime. Jeni të lirë të garoni; në Kuvend e keni mundësinë. Tani vendimi nuk është më i imi, është i LDK-së.

Dua ta them qartë; nuk jam i lidhur pas pozitës. Jam i lidhur pas shtëpisë. Dhe shtëpia ruhet me rregull, me dinjitet dhe me besim në anëtarësinë e saj dhe në secilën kërkesë të tyre.

Më shumë se dorëheqja nuk ka çfarë të ofrojë një politikan. Eliminimet politike mund të jenë legjitime si aspiratë, por edhe për to vendos anëtarësia si tërësi, jo ne individualisht.

Kemi thirrur Kuvendin. Aty flasim hapur. Aty propozojmë hapur. Aty vendosim hapur. Le ta presim Kuvendin. Le ta mbajmë debatin para shtëpisë sonë, me orë të tëra, me ditë të tëra po qe nevoja. Jemi të njohur për demokraci dhe liri veprimi. Le të sillemi me përgjegjësi. Sepse LDK nuk është reagim i çastit, nuk është as protagonizëm i ditëve të vështira; edhe më pak vendim i rrjeteve sociale e duartroktijeve të kundërshtarëve. LDK është institucion.

Ta keni të qartë. Jo sot, jo dje po gjithëherë: Fatin tim politik e vendos përballë LDK-së, jo mbi LDK-në. Dhe çfarëdo vendimi që merr Kuvendi, do ta respektoj me nder dhe qetësi

Deri atëherë, le të sillemi si mbrëmë e si deri tash, pa dramë e pa protagonizëm, ballëhapur e me dinjitet.

Sepse mbi çdo emër është LDK.

Dhe kështu na takon të gjithëve./ CNA





Lajmet e fundit nga