FOTO+VIDEO-Masakra në plazhet e Dhërmiut, gërryerje masive në faqen e malit/ Si po shkatërrohet zona turistike

2023-10-15 13:50:00, Denoncim CNA

Një masakër mjedisore po zhvillohet në zonën turistike në Dhërmi. Sipas fotove dhe videove të siguara nga CNA TV duket se mjetet e rënda i janë qepur një faqeje mali të Dhërmisë dhe në pjesën e zonës rreth plazhit fantastik dhe të rrallë të detit Jon.

Në pamje duket qartë se ka disa eskavatorë dhe disa mjete të rënda, kamionë që punojnë pa ndalim për të gërryer një faqe mali në këtë zonë. Rrëzë malit, atje ku fillon deti, po gërmohet, po gërryhet, po shkatërrohet, siç duket nga fotot.

Janë hequr pemë dhe i janë qepur malit në lartësinë që duket të jetë deri në 20 metra apo edhe më tepër. Pamjet nga rruga apo nga fshati nuk duken pasi vendi ku po kryhet gërmimi është në fund, në shpatin e malit në krah të majtë të plazhit të Dhërmisë, thuajse në cep të tij dhe nga rruga është e pamundur për t'u parë.

Gërmimet kanë filluar pak kohë më parë, menjëherë pas përfundimit të sezonit turistik dhe duket se po kryhen volume të mëdha punimesh. Banorë të zonës thonë se qeveria ka dhënë leje për një hotel, pasi në të gjithë atë pjesë të bregdetit janë dhënë edhe disa hotele të tjera, resorte, e të tjera si këto.

Por në asnjë nga rastet nuk duket që investitorët apo ndërtuesit e zonës të gërryejnë dhe të çmontojnë malin në këtë lloj forme e cila duket se përtej një gërmimi për ndërtim është një masakër në shpatin e malit në bregun e detit në Dhërmi./ CNA