E fundit!

20:46 Politikë

“Në drejtimin e duhur me kalendarin ambicioz”/ Rama: Jam optimist në mënyrën më shqiptare për mbylljen e kapitujve

Kryeministri Edi Rama gjatë fjalës së tij në konferencën n...

Shpërndarja mujore e buxhetit 2024/ Dhjetori, marsi dhe tetori, pritshmëritë më të larta në të ardhura

12 Mars 2024, 15:51, Ekonomi CNA

Shpërndarja mujore e buxhetit 2024/ Dhjetori, marsi dhe tetori,

Treguesit fiskalë të buxhetit fillestar 2024 të detajuara në baza mujore tregojnë se dhjetori, nëntori dhe marsi kanë pritshmëri më të larta për arkëtimin e të ardhurave gjatë këtij viti.

Mesatarja e arkëtimeve të të ardhurave buxhetore është mesatarisht 56 miliardë lekë në muaj, ndërsa në muajin dhjetor planifikohen të arkëtohen rreth 65 miliardë lekë, ose 630 milionë euro. Gjithashtu pritshmëritë për muajt mars dhe tetor janë më të larta se mesatarja vjetore, përkatësisht me 58.4 dhe 59,9 miliardë lekë.

Në anën tjetër janari, shkurti dhe maji kanë plan të ardhurash më të ulët se mesatarja vjetore. Në shkurt planifikohen të arkëtohen 45,5 miliardë lekë dhe maj 53,9 miliardë lekë.

Kalanderi vjetor i arkëtimeve buxhetore po ndjek ciklin e ekonomisë. Të ardhurat më të larta përkojnë me fluksin e aktivitetit ekonomik, kryesisht në gjysmën e dytë të vitit. Pas qershorit deri në dhjetor ekonomia dhe qarkullimi nxiten nga turizmi, sezoni i prodhimeve bujqësore, ndryshe nga muajt e parë të vitit.

Zgjatja e sezonit turistik vitin e kaluar deri në vjeshtën e vonë pritet të vijojë më të njëjtat ritme edhe këtë vit, duke shtyrë qeverinë që të kenë pritshmëri të larta në arkëtime deri në fund të vitit për të kulmuar në dhjetor. Ashtu si në të gjithë botën edhe në vendin tonë, festat e fundvitit nxisin konsum jo të zakontë që përkthehet edhe në të ardhura më të larta në buxhet. Në këtë muaj plani i të ardhurave është 15 % më i lartë se mesatarja vjetore.

Shpërndarja mujore e buxhetit 2024/ Dhjetori, marsi dhe tetori,

Teksa qeveria e ka shpërndarë në mënyrë të harmonizuar vjeljen e të ardhurave sipas muajve, nuk vepron në të njëjtën mënyrë edhe me shpenzimet publike.

Shpenzimet buxhetore janë mesatarisht afërsisht 61 miliardë lekë në muaj këtë vit, por në dhjetor ato janë planifikuar 106,3 miliardë lekë. Kjo shumë përfaqëson 14,4 % të shpenzimeve totale buxhetore. Por duke qenë se në krahun e shpenzimeve plani buxhetor nuk respektohet, në muajin dhjetor akumulohet një shumë edhe më e madhe për t'u shpenzuar.

Investimet buxhetore janë zëri më produktiv në buxhet, pasi nëpërmjet tyre qeveria rrit vlerën e shtuar në ekonomi duke përmirësuar infrastrukturën në rrugë, ujësjellës, linjat e energjisë etj., por përqendrimi i tyre në dy muajt e fundit ngre shqetësimet për eficiencën e përdorimit të fondeve.

Vitin e kaluar Drejtoria e Auditimit në Ministrinë e Financave kërkoi që institucionet duhet të fokusohen në marrjen e masave për realizimin e këtij treguesi pasi mungesa e injektimit të likuiditetit në ekonomi ndikon ndjeshëm në sigurimin e mirëqenies në vend, në mosstimulimin e rritjes ekonomike, në hapjen e vendeve të reja të punës apo të ardhurat nga tatimet e taksat./ Monitor.al