web counter
LEXO PA REKLAMA!

SHKARKO APP

App Store
Google Play

E fundit!

x

Pas reformës territoriale, Kamza me rritjen më të lartë të bizneseve me mbi 10 të punësuar

21 Qershor 2024, 14:14, Ekonomi CNA
Pas reformës territoriale, Kamza me rritjen më të lartë
Foto marrë nga Google

Aktiviteti ekonomik është ulur ndjeshëm në disa bashki të vendit që pas konfigurimit të ri të reformës territoriale të vitit 2014.

Regjistri i bizneseve sipas bashkive tregon se gjatë 2014-2023 numri i bizneseve mbi 10 punonjës ka rënë dukshëm në disa bashki, ndërsa në disa të tjera është rritur duke treguar se shpërndarja e zhvillimi kanë ndryshime të dukshme nga rajoni në rajon.

Të dhëna të detajuara tregojnë se Kamza ishte bashkia me rritjen me të madhe të bizneseve mbi 10 të punësuar ndërmjet vitit 2014-2023 dhe në krahun tjetër, Bashkia e Këlcyrës kishte rënien më të madhe të bizneseve mbi 10 të punësuar.

Kamza numëroi 180 subjekte mbi 10 të punësuar në vitin 2023 nga vetëm 80 të tilla në vitin 2014. Në këtë bashki janë transferuar një seri biznesesh fasone gjatë dekadës së fundit për shkak të taksave më të ulëta dhe fuqisë së re punëtore.

Pas Kamzës, numri i bizneseve me mbi 10 punonjës është rritur në Bashkinë e Vorës me 112% ndërmjet 2014-2023. E ndodhur në mes të Durrësit dhe Tiranës dhe në afërsi të Aeroportit të Rinasit dhe Portit të Durrësit, ngjitur me autostradën Vora është një lokacion i lakmuar për biznes.

Saranda ishte bashkia e tretë me rritjen më të madhe të bizneseve me 10 punonjës. Në vitin 2023 numëroheshin 97 të tilla nga 48 që ishin në vitin 2024.

Më tej rritja më e madhe e bizneseve me mbi 10 punonjës ishte në bashkitë e Pustecit, Rrogozhinës, Himarës, Krujës, Lushnjës, Durrësit, Patosit, Cërrikut etj.

Siç shihet nga grafiku i mëposhtëm, rritja më e madhe në kategorinë e bizneseve me mbi 10 të punësuar ka ndodhur në qytetet që kanë zhvilluar industrinë fasone, industrinë e shërbimeve me turizmin dhe bujqësinë.

Nga ana tjetër, disa bashki të vogla që janë larg qendrave të mëdha urbane kanë shënuar rënie të bizneseve me 10 të punësuar.

P.sh. në Bashkinë e Këlcyrës nuk ka asnjë biznes me mbi 10 punonjës, teksa në vitin 2014 ishin 12 të tilla. Në Bashkinë e Poliçanit ka një rënie me 50%, pasi në vitin 2023 u numëruan vetëm 7 biznese të tilla nga 16 që ishin në vitin 2014.

Rënia e bizneseve me mbi 10 të punësuar ishte e fortë edhe në Bashkitë e Fushë-Arrësit, Memaliajt, Delvinës, Skraparit, Mallakastrës dhe Kolonjës. E përbashkëta e këtyre bashkive që kanë pësuar rënie të bizneseve lidhet me faktin e rënies së popullsisë nga zhvendosjet e brendshme dhe emigrimin.

Në të gjithë vendin në vitin 2023 kishte 9365 ndërmarrje lokale me mbi 10 të punësuar.

Bashkia e Tiranës ka numrin më të madh të bizneseve me 10 punonjës në 2023 me 4430 biznese me mbi 10 të punësuar, të cilat përbejnë me 47% të totalit të bizneseve në 2023 në këtë kategori.

Më pas në renditje vijnë bashkitë e Durrësit, Vlorës, Shkodrës dhe Elbasanit që kanë numrin më të madh të bizneseve mbi 10 punonjës./Monitor





Lajmet e fundit nga