Flet Florion Mima: Qeveria nuk ka bërë rritje page për arsimin dhe shëndetësinë, por indeksim

6 Korrik 2022, 15:57, Ekonomi CNA

Florion Mima

Pas mbledhjes së fundit të Këshillit të Ministrave, Evis Kushi dhe Ogerta Manastirliu deklaruan për mediat se qeveria kishte marrë vendimin për të rritur me 6% pagat për punonjësit e arsimit parauniversitar dhe atyre të shëndetësisë.

CNA.al kontaktoi me ish ministrin e Ekonomisë Florion Mima, i cili hodhi më shumë dritë mbi vendimin e fundit të qeverisë.

Sipas tij, qeveria nuk ka bërë rritje të [agave me 6%, por thjesht indeks, pra vendosja e të ardhurave dhe gjendjes pasurore në atë nive që ishte.

Ish ministri tha se, qeveria nuk mbështet qytetqarët dhe as pensionistët, duke ngritur pikëpyetjen se për çfarë përdoren të ardhurat ekstra që hyjnë në vendin tonë.

“Sigurisht që nuk bëhet fjalë për kurrëfarë rritje. Kur shkalla e rritjes së pagave a të të ardhurave të tjera personale është sa norma zyrtare e inflacionit, kemi të bëjmë thjesht me atë që quhet indeksim, e që nuk është gjë tjetër veçse një rivendosje e gjendjes pasurore a e të ardhurave në atë nivel që ishte, pasi inflacioni e kishte gërryer duke e tkurrur vlerën e tyre reale.

Gjithkush e kupton sikletin e qeverisë që e quan rritje, jo vetëm këtë të sotmen por edhe gjysmëindeksimin vetëm një herë në 9 vite të pensioneve: qeveria nuk do që t'u kthejë mbrapsht realisht qytetarëve tatimpagues, të gjithën a ndoshta një pjesë të super të hyrave extra që vinë nga rritja e çmimeve të mallrave e shërbimeve, rritje që përballohet vetëm nga tatimpaguesi shqiptar. Po për çfarë i përdor qeveria këto extra të hyra kur nuk i vë në shërbim të njerëzve të këtij vendi, a kur nuk i përdor për punë të mbara publike a për uljen e deficitit buxhetor a borxhit publik? Shihini me kujdes si vijojnë të financohen PPP kriminale, shumica e të cilave ose është nën hetim, ose është e sekuestruar si skenë krimi”, tha Mima për CNA.al.

Më tej, ish ministri i Ekonomisë deklaroi se indeksi i punonjësve të arsimit dhe shëndetësisë erdhi një ditë para protestës së opozitës. Sipas tij,, ky vendim është marrë jashtë çdo procesi ligjor të rishikimit buxhetor të mesvitit, ndërsa shton se po tentohet tu hidhet hi syve shqipatrëve.

“Deklarimi i indeksimit vetëm një ditë para protestës së opozitës, jashtë çdo procesi ligjor të rishikimit buxhetor të mesvitit, tregon përpjekjen e qeverisë për t'i hedhur hi syve grupit më masiv, të të punësuarve buxhetorë në shëndetësi e arsim dhe frikën që ka kjo qeveri nga revolta e të pakënaqurve, e të mashtruarve, e të grabiturve. Lajm i mire, pra, nuk është indeksimi por fillimi i protestave të vërteta që do të sjellin një qeveri të njerëzve që punon për njerezit. Me një qeveri të njerëzve, edhe administrimi i ndershëm e ligjor i parasë publike do të ndryshojë rrënjësisht duke iu bërë krah njerëzve që paguajnë taksa a që kanë nevojë për ndihmë nga arka e përbashkët, jo atyre që grabisin taksat e popullit”, tha Mima për CNA.al.