2025, për herë të parë numri i punonjësve me paga të larta kalon ata me paga minimale

6 Prill 2026, 07:42, Ekonomi CNA

2025, për herë të parë numri i punonjësve me paga

Tregu i punës në Shqipëri edhe në tremujorin e fundit të vitit 2025 vijoi me zhvendosjen forcës punëtore nga kategoritë e pagave të ulëta drejt atyre të mesme dhe të larta.

Ky ndryshim nisi që në fillim të vitit 2023, ku rreth 38% e të punësuarve pozicionoheshin në fashën e pagës minimale deri në 40,000 lekë, ndërsa deri në fund të vitit 2025, kjo kategori pothuajse është përgjysmuar në peshë specifike me 12.6 për qind të totalit të të punësuarve me pagë.

Kjo zhvendosje shpjegohet kryesisht me politiken agresive të rritjes së pagës minimale ligjore nga niveli 32 mijë lekë në 2023 në 40 mijë lekë në 2024, e cila ka shërbyer si një dysheme që ka shtyrë të gjitha fashat e tjera drejt rritjes, duke detyruar bizneset të rregullojnë strukturën e tyre të kostove.

Teksa shihet dyfishim i peshës së pagave të larta me mbi 120,000 lekë. Kjo kategori pagash zinte 7 për qind të totalit të punonjësve me pagë në fillim të vitit 2023, teksa arriti në mbi 16% në fund të vitit 2025.

Ky dyfishim i peshës së pagave të larta vjen prej politikës së qeverisë për të rritur pagat në sektorin publik përgjatë 2022-2024. Gjithashtu rritja e presionit në tregut për të mbajtur talentet, për shkak të emigrimit ka detyruar punëdhënësit të ofrojnë paketa më konkurruese edhe për disa profesione që nuk kërkojnë shumë aftësi.

Për herë të parë në tremujorin e fundit të vitit 2025 numri i njerëzve që paguhen me paga të larta, mbi 120 mijë lekë tejkaloi numrin e atyre që marrin pagë minimale. Punonjësit mbi paga 120 mijë lekë zunë 16.2 % të totalit te të punësuarve me pagë, ndërsa punonjësit me pagë minimale zunë 12.8% të totalit.

Numri më i madh i punonjësve më pagë është në fashën 60,000 dhe 95,000 lekësh, e cila dominon një të katërtën e të punësuarve me pagë. Rritja e menjëhershme e përqindjeve të punonjësve në kategoritë e larta të pagave sinjalizon se shumë biznese kanë filluar të deklarojnë pagat reale të punonjësve, duke shmangur praktikën e vjetër të pagesave në dorë mbi pagën minimale të deklaruar. Ky trend u nxit edhe nga presioni i tatimeve që vitet e fundit u përqendrua në sektorët me informalitet të lartë të pagave, si ndërtimi dhe akomodimi.

Presioni mbi bizneset për pagat po rritet nga mungesa e fuqisë punëtore të kualifikuar. Rritja e pagës minimale në 50 mijë lekë këtë vit nga 40 mijë që ishte vitin e kaluar pritet të shtyjë për lart të gjitha kategoritë e pagave.

Bizneset që mbështeten te paga minimale do të duhet ose të automatizojnë proceset e tyre, ose të mbyllen, pasi forca punëtore me pagë minimale po vjen në ulje të shpejtë dhe po zhvendoset në fashat mbi 50,000 lekë./ Revista Monitor