web counter
LEXO PA REKLAMA!

SHKARKO APP

App Store
Google Play

Kodi Penal i Mero Bazes

30 Korrik 2025, 13:56, Plaku Mere CNA

Kodi Penal i Mero Bazes

Disa ditë më parë, në datën 25 korrik, u bë një prezantim publik i një draft-Kodi Penal. Çuditërisht nga propaganda dhe nga mediat që janë kryesisht në shërbim të kryebashkiakut Erion Veliaj, megjithëse kanë ngelur pak ose shumë pak, u shit si një Kod zyrtar i përgatitur nga Ministria e Drejtësisë dhe qeveria.

Dhe, ky Kod ishte përgatitur nga Ulsi Manja që kishte bërë çudira, çfarë nuk ka shkruar atje brenda, kryeministri Rama, gjithë qeveria etj.

Në fakt, mjafton ta shikosh prezantimin për herë të dytë që të ndjekësh çfarë kanë thënë folësit dhe e kupton se ai nuk është një Kod Penal i përgatitur nga qeveria shqiptare, por është një draft-kod, i cili është përgatitur nga një grup pune dhe ka filluar që në vitin 2019.

Në fakt, sipas të dhënave që u thanë zyrtarisht në vitin 2019, në kohën kur ministre ka qenë Etilda Gjonaj, është ngritur një grup pune për të diskutuar a ka nevojë për ndryshime në Kodin Penal në kuadër edhe të hapave që po hidhen drejt BE-së.

Pa diskutim që ka nevojë dhe në vitin 2023 gjatë kohës që ministër ka qenë Ulsi Manja grupi i punës ka marrë formë ligjore, që do të thotë një grup që punon për interes të Kodit dhe që njihet nga Ministria e Drejtësisë.

Gjithashtu vendoset edhe një grup tjetër që quhet grup oponence dhe kjo është e qartë. Pra, është një grup pune që kryesohet nga Arben Rakipi, për të cilin nuk ka pagesa nga qeveria, nuk ka dorë Ministria e Drejtësisë, nuk ka dorë kryeministri Rama, por një grup juristësh, penalistësh, që drejtohen nga Arben Rakipi, i cili sot është njeriu që komandon dhe kontrollon Shkollën e Magjistraturës e shumë juristë të tjerë.

Po ta ndjekësh me vëmendje takimin, ekspertë, penalistë, profesorë të së drejtës, folën dhe thanë që ky nuk është një Kod, por një draft mbi të cilin duhet diskutuar dhe duhet përmirësuar.

Dikush e vlerësonte me notë kaluese, dikush e vlerësonte me notat 7 apo 8, por që ky draft-kod të marrë formën e tij të plotë, përtej punës që ka bërë ky grup, duhet të ketë tryeza konsultimi, duhet të marrë vulën e BE-së.

Për të marrë vulën e BE-së duhet të vijnë ekspertë nga Europa, të cilët do të shënojnë nen për nen, sepse duhet përshtatur me shembuj dhe raste nga kodet më të mira të BE-së, pra të jetë një hap përpara për rrugën që ka marrë Shqipëria drejt Europës.

Pra, nuk kemi një Kod të përgatitur nga Ulsiu apo Rama siç po përpiqet të shitet nga propaganda, por kemi një grup pune që ka bërë një draft-kod, i cili, siç u tha dhe në atë prezantim, do të shkojë në tryeza konsultimi me ekspertë, do të diskutohet nen për nen që të mos jetë thjesht një Kod me nota kaluese apo me një mesatare, por të marrë vulën e BE-së, që është nota 10.

Meqenëse edhe Shqipërisë i janë hapur kapitujt, ka negociata me BE-në dhe nuk mund të shkohet me një draft-kod apo me një Kod Penal që të mbyllë derën e BE-së.

Sot nuk kemi një Kod të ri, por kemi një draft që do të konsultohet dhe nuk është përgatitur nga Ministria e Drejtësisë, ministri Manja apo kryeministri Rama, por nga një grup pune i kryesuar nga Arben Rakipi.

Ndërkohë që Kodi në opinionin publik po shitet si i përgatitur nga Ulsi Manja. Ne mund të themi që ky nuk është Kodi i Ulsi Manjës, por është edhe Kodi i Mero Bazes. Meqenëse ky i fundit ka zgjedhur t’i vendosë emrin e Ulsiut, ne mund t’i vëmë emrin e Meros, i cili ka hall me Ulsiun për çështjen e Erion Veliajt, për ngjarjet e mëdha që i quan ai, për vizitat dhe hallet e Erionit në burgun e Durrësit.

Mesa duket ministri i Drejtësisë, meqenëse respekton ligjin dhe jo Meron, dhe jo mjerot e tjerë të politikës, të cilët kërkojnë ato që shumë pak njerëz i dinë, duke qenë që opinioni do të kishte një reagim të parë negativ ndaj draft-kodit, problematikave që ka, pasi shumë prej tyre dhe nuk e kuptojnë, normalisht Mero ia faturon Ulsiut.

Në fakt, është një grup pune, i cili nuk ka asnjë lidhje as me Ulsiun, as me Edi Ramën, as me askënd tjetër. Është një draft që do të diskutohet në tryezë dhe do të marrë vulën e BE-së.

Mero thotë që është drafti i Ulsiut, ne themi që është drafti i Meros, dikush tjetër mund të thotë që është drafti i Ramës, dikush mund të thotë që është i Saliut, se Mero dikur e ka pasur fiksim Saliun, ndërsa tani duket se ka hequr dorë dhe ka fiksim Mulin, Ulsiun, Belindin. Ndërkohë dashuri të jetës e ka Erion Veliajn, i cili ka 13 akuza nga SPAK-u dhe rrezikon që përballë drejtësisë të dënohet për vepra shumë të rënda penale./ CNA





Lajmet e fundit nga