“Ujin tonë nuk e ndajmë me askënd”/ Banorët bllokojnë punimet e ujësjellësit në Burimas

4 Nëntor 2025, 14:53, Denoncim CNA

“Ujin tonë nuk e ndajmë me askënd”/ Banorët

Në fshatin Burimas të Bashkisë Maliq, banorët kanë dalë sot në protestë duke bllokuar punimet për ndërtimin e një linje të re ujësjellësi që do të lidhë Burimasin me fshatin Zvezdë. Ata shprehen të revoltuar, pasi ndërhyrja është bërë gjatë natës, pa asnjë njoftim paraprak nga autoritetet. Protestuesit pretendojnë se nuk janë informuar për projektin dhe dyshojnë se nga depoja e tyre e ujit do të merret ujë për t’u dërguar në fshatra të tjera. Ata theksojnë se burimi aktual është siguruar me kontributet e vetë banorëve dhe nuk pranojnë që të cenohet.

Kryeplaku i fshatit, Edmond Agolli, u shpreh se pavarësisht komunikimeve me bashkinë dhe drejtorinë e ujësjellësit, askush nuk ka dhënë sqarime të plota mbi projektin. Ai tha se banorët kanë bllokuar punimet pasi dyshojnë se lidhja e tubacioneve do të ndikojë në furnizimin e tyre me ujë.

"Unë kam folur me kryetarin e bashkisë, me administratorët, na thonë që është projekti, nuk do të marrim ujë. Te depoja jonë që është aty lart, për të futur ujë nuk ka, kurse për të nxjerrë ujin është dalja. Prandaj dyshojmë që duan të marrin ujë nga depoja jonë. U ngrit gjithë fshati në protestë. Punimet këtu i bllokuam pasi do të bëhej lidhja me tuba dhe s'i lejuam që t'i lidhnin. E keqja është që pse s'vijnë nga bashkia dhe drejtoria e ujësjellësit të na sqarojnë si është projekti."

Banorët tregojnë se pusin e kanë hapur vetë, me ndihmën e disa biznesve lokale, pa mbështetje nga shteti. Ata akuzojnë punonjësit e ujësjellësit se kanë nisur punimet gjatë natës, ndërsa mëngjesin e sotëm janë përpjekur të lidhnin tubat, gjë që është penguar nga vetë komuniteti.

"Jemi fshatarë të fshatit Burimas, kemi hapur një pus mbi fshat me kontributin tonë, dhe ndihmë nga gurorja, pra e hapëm ne jo shteti. Këta të ujësjellësit kanë punuar natën këtu dhe kërkojnë të marrin ujin e fshatit tonë dhe ta çojnë në Zvezdë. Po protestojmë, i ndaluam dhe punimet."

"Për këto punime që po bëhen tani nuk është vënë në dijeni asnjëri, as kryeplaku i fshatit, as ne si banorë. Punimet u bënë natën pa dijeninë tonë. Ne si fshat nuk jemi dakord që uji jonë të merret."

Një tjetër banor, 82 vjeç, kujton se Burimasi ka qenë për vite burim furnizimi me ujë edhe për fshatrat përreth, si Sheqerasi, Rëmbeci dhe zona e fushës së Maliqit, por sot, sipas tij, fshati ndodhet sërish në vështirësi për ujin e pijshëm.

"Jam 82 vjeç, këtij fshati i kanë rënë më qafë për ujin pasi ky fshat ka furnizuar edhe Sheqerasin, edhe Rëmbecin dhe gjithë fushën e Maliqit që në kohën e monizmit."

Ndërkohë, përfaqësues të ujësjellësit kanë mbërritur në terren për të biseduar me protestuesit. Ata kanë sqaruar se projekti nuk synon të marrë ujë nga Burimasi, por të krijojë një linjë të përbashkët që do të garantojë furnizim të qëndrueshëm dhe të sigurt për të dy fshatrat.

Fshati Burimas numëron rreth 800 banorë dhe është përballur ndër vite me mungesë të ujit të pijshëm, duke zhvilluar disa herë protesta për këtë problem./CNA