“Shokët s’më pritën dot, rashë në tokë”/ 13-vjeçari pëson frakturë nga “sfida e Supermenit” në TikTok

16 Dhjetor 2024, 21:43, Denoncim CNA

“Shokët s’më pritën dot, rashë në

Kohë më parë loja e bujshme në TikTok, Pokemon Go u kthye në fenomen botëror e me pasoja. Kudo shiheshin të rinj të cilët në mënyrë të dyshimtë lëviznin rrugëve me telefona në dorë në përpjekje për të mbledhur Pokemonë. Pas saj loja e rrezikshme, e njohur si “Balena Blu”, çoi shumë fëmijë deri në vetëvrasje.

Këto ditë një tjetër kërcënim është shfaqur në TikTok duke vënë në rrezik jetën e fëmijëve. “Sfida e Supermenit” ose “Superhero”, ka shënuar trauma tek shumë nga përdoruesit e TikTok. Sfida qëndron tek hedhja përpara me një krah të zgjatur, si personazhi për fëmijë, Superman, për t’u kapur ose jo nga miqtë.

Nga “loja” e rrezikshme që është përhapur edhe në Shqipëri, mbi 10 të rinj janë raportuar të lënduar. Arbri është një 13-vjeçcar dhe tregon për “Stop” në Tv Klan se është viktimë e kësaj loje. Ai nuk ka telefon, por nën ndikimin e shokëve, ia nënshtrua lojës së rrezikshme dhe Arbri theu dorën e dëmtoi shtyllën kurrizore.

Arbër: Këtë lojë e mësova nga shokët. Ishim rreth 7 ose 8 vetë dhe po luanim të gjithë, pati dëmtime edhe te të tjerët, por kur erdhi radha ime më hodhën shumë lart dhe nuk më pritën dot, rashë me dorën e majtë në tokë. Kjo shkoi në dëmtimin e dorës sime.

Gazetarja: Pra ty nuk të kthyen mbrapsht por ty të hodhën në drejtim vertikal, lart apo jo?

Arbër: Po dhe asnjëri nuk më priti ngaqë ishte edhe frika se kisha shkuar shumë lart.

Gazetarja: Ju ishit në ambientet e shkollës apo në lagje?

Arbër: Në ambientet e shkollës, në pushim të gjatë. Pastaj erdhi oficerja por kisha pak frikë dhe nuk i tregova që e kisha vrarë me lojën e TikTok-ut. Pas pak vazhdoi dhe dora duke m’u ënjtur dhe mësuesja lajmëroi mamin, u drejtuam direkt në Spitalin Ushtarak, morëm vesh që kisha thyer krahun dhe e futa dorën në allçi.

Gazetarja: Pate dëmtime të tjera veç krahut që tashmë e ke edhe të fashuar?

Arbër: Vetëm kur isha në ajër, u përdrodha dhe e kam kurrizin me problem, asgjë tjetër.

Gazetarja: Ti Arbër ke telefon?

Arbër: Jo, nuk kam, vetëm ma kanë treguar shokët lojën.

Gazetarja: Kjo ka qenë loja e parë që keni provuar nga TikTok-u?

Arbër: Hera ime e parë ishte, të tjerët e kishin provuar edhe më parë. Dua t’u them të gjithë fëmijëve që e shohin këtë trend në TikTok, mos ta luajnë sepse është shumë e rrezikshme, ka shumë fëmijë që janë lënduar, thyerje këmbe, gjuri dhe duarsh.

Gazetarja: Në ditën kur ti ke qenë në spital, çfarë ka ndodhur tjetër përveçse u mjekove, çfarë pe ti në spital?

Arbër: Ishin shumë fëmijë, ishin të lënduar në gjunj, kishin thyer kupën e gjurit, kyçin e këmbës dhe njëri kishte thyer të dyja duart. Për këtë iu drejtova “Stop”-it, dua t’u them që ta lëndojnë këtë lojë.

Psikologia Gejsi Anamali tregon sesi duhet të komunikojmë me fëmijët në të tilla raste, pasi ata shtyhen dhe drejtohen nga turmat në shkollë për t’u bërë pjesë e lojës. Ndërsa eksperti i IT-së Tomi Kallanxhi tregon se ofrohen opsionet “Family sharing” në TikTok si një mënyrë që prindërit të monitorojnë fëmijët./ tvklan