web counter
LEXO PA REKLAMA!

SHKARKO APP

App Store
Google Play

E fundit!

x

Thellohet gropa e korrupsionit/ Të tjera fije financimi për Ajola Xoxën

12 Dhjetor 2024, 11:26, Denoncim CNA
Thellohet gropa e korrupsionit/ Të tjera fije financimi për Ajola
Erion Veliaj dhe Ajola Xoxa, foto e marrë nga rrjetet sociale

Gropa e korrupsionit ku janë zhytur Ajola Xoxa dhe Erion Veliaj po thellohet dita-ditës edhe më shumë. “Plug” ka zbardhur skemën e pastrimit të parave dhe korrupsionit brenda familjes Veliaj-Xoxa. Këtë herë në fokus janë fijet e financimit të Ajola Xoxës nga kompania e inceneratorëve për “Harabelin”.

Në 6 maj të këtij viti, gazetari holandez, Vincent van Gerven, ka publikuar një artikull investigativ, që tregon implikimin e bashkëshortes së kryebashkiakut të Tiranës Erion Veliaj, Ajola Xoxa, në skema të tilla.

Në shkrimin me titull: “Si pastrohen paratë përmes artit dhe koncensioneve të menaxhimit të mbetjeve”, publikuar në “The Albanian Mechanism”, gazetari holandez tregon si u financua Ajola Xoxa nga kompania e inceneratorit të Sharrës.

Në uebsajtin aktual të “Harabel”, Xoxa e liston veten si "bashkëthemeluese" dhe "drejtoreshë kreative". Ajo është gjithashtu themeluese e galerisë "NAAN" dhe galerisë "GurGur", ku “Harabel” ka organizuar ekspozita.

Adresa zyrtare e “Harabelit” në "Sky Tower", në zonën më të shtrenjtë të Tiranës, është në të njëjtën ndërtesë me kompaninë "The Partners" po të Ajola Xoxës.

Ish-drejtoresha e programit të "Harabelit" dhe koordinatorja aktuale ligjore, Xhoi Skënderasi, gjithashtu mban një vend në bordin e kompanisë botuese të Xoxës, “Botimet Enciklopedike” dhe është e punësuar në kompaninë "Partners Law" që nga themelimi i saj.

Me fjalë të tjera, “Harabel” është shumë i lidhur me interesat e biznesit të Xoxës, theksohet në emisionin "Plug".

Gazetari holandez ngre pyetje retorike, në lidhje me interesin që kishte Klodian Zoto dhe Mirel Mërtiri për të financuar artin kontemporan të Ajola Xoxës. Ai i jep përgjigje kësaj pyetje duke u shprehur se financimi ka motive të fshehta.

Pra, nuk do të ishte e paarsyeshme të mendohej se edhe sponsorizimi i tyre për eventet artistike të "Harabelit" ka motive të fshehta, vetëm një ndër episodet në një shkëmbim të ndërsjelltë favoresh mes bashkisë së Veliajt dhe biznesmenëve.

Ndaj, ndoshta, pasi kemi paraqitur një rrëfim faktik, mund të përfundojmë me një spekulim të shkurtër: Siç dëshmohet nga dosja e Ahmetajt, "Integrated Energy BV SPV" iu dha koncesioni i Sharrës falë nismës dhe mbështetjes së kryebashkiakut Veliaj, bashkia e të cilit është gjithashtu përgjegjëse për pagesat për "Integrated Energy BV SPV" për një periudhë 30-vjeçare, trajton emisioni “Plug”.

Në këmbim, kompania bëri gjestin e vogël të mbështetjes së karrierës së sapolindur kuratoriale të gruas së kryebashkiakut duke sponsorizuar një park skulpture në landfillin që menaxhon.

Gjithashtu, gazetari e cilëson këtë veprim të artitistit Sislej Xhafa si artshpëlarje të një koncensioni të menaxhuar në tokë të larë me gjak dhe në kurriz të qytetarëve të Tiranës.

Për këtë investigim, gazetari holandez ka kërkuar deklaratë nga emrat e përmendur në artikull, por sipas tij askush nuk ka denjuar të përgjigjet. Megjithatë, disa kohë më herët, në 3 korrik të vitit 2021, profili në rrjetin social "Instagram" i “Harabelit”, reagonte duke pretenduar se nuk ka pasur kurrë marrëdhënie financiare mes kësaj shoqate dhe kompanisë së inceneratorit të Tiranës. Më pas gazetari holandez kërcënohet, nga bashkëpunëtorët e Ajola Xoxës.

Referuar deklaratave të pasurisë së Ajola Xoxës, rezulton se gjatë vitit 2023, vetëm nga qendra “Harabel”, ka arkëtuar një shumë prej 22.481 eurosh. Viti 2023 është momenti i vetëm që Ajola Xoxa deklaron të ardhura nga qendra “Harabel”, ndonëse kjo e fundit ekziston prej vitit 2018.

Në vitin 2023, Ajol Xoxa, ndër të ardhurat e shumta financiare nga bizneset, konsulenca, qiratë, deklaron edhe një shumë prej 22 mijë eurosh të ardhura neto nga veprimtaria e pavarur profesionale. Konkretisht, këtë shumë, Ajola Xoxës ia ka paguar shoqata “Balkan Youth Link-Albania”, e cila ka akronimin shkurt “BYL-A”./ CNA





Lajmet e fundit nga