“S’e kemi ne në dorë...”/ Pacienti nuk kurohet në QSUT, aparatura nuk vihet në punë

12 Shkurt 2024, 21:24, Denoncim CNA

“S’e kemi ne në dorë...”/ Pacienti nuk kurohet

Në këtë pjesë të emisionit “Stop” solli rrëfimin e një pacienti të dëshpëruar të cilit nuk i kanë mbetur më para për të kuruar sëmundjen e tij.

Ato, që pati kursyer i shpenzoi për terapitë në spitale private. Në gjymtyrët e poshtme qytetari ka njolla, pasi është prekur nga “sarkoma kaposi”.

Nëse nuk kurohet, njollat do t’i përhapen në gjithë trupin dhe shëndeti i tij do të jetë në rrezik.

Denoncuesi tregon se ka shkuar disa herë në QSUT, por i thonë që është gati aparatura për problemin e tij, por nuk po e vënë në funksion.

“Më është shfaqur një sëmundje para 1 vit e gjysmë. Pas vizitave dhe ekzaminimeve që bëra u konstatua që ishte një sëmundje që bën pjesë në sëmundjet tumorale të lëkurës. Pasi bëra të gjitha ekzaminimet, biopsinë e të gjitha këto, më rekomanduan që hapa dhe kartelën tek spitali onkologjik vjet në Shkurt. Si përfundim bëra dhe konsultën me komisionin dhe më rekomanduan që do mjekohesha me radio terapi.

Më thonë që na është prishur aparatura dhe po merremi me këtë punë. Na kanë ardhur aparatura të reja dhe do të riparohej dhoma atje. Po si do bëhet thashë se në fakt i kisha shumë të acaruara. Ai më rekomandon që vetëm tek ata do vesh se ata kanë aparaturë. Ana financiare në fillim u paguan 3 milionë Lekë se kaq e ka atë, bëra seancë në Shkurt, Mars, dy seanca atje dhe nuk vazhdova dot më.

Kjo sëmundje dëmton enët e gjakut. Në fillim shfaqet tek ekstremitetet e poshtme, është një sëmundje autoimuno. E vetmja në opsionet e mjekimit për të mos vajtur tek kimioterapi, më rekomanduan që jep radioterapi, e bombardojnë me rreze atë. Para disa ditësh vajta atje është të vesh duart në kokë. Gjysma ishte bërë. Takoj shefin e radiologjisë më thotë kam vajtur në ministri e kam bërë problem, dhe ne të gjitha menaxhimet e këtyre spitaleve, janë 5 spitale kombëtare të gjitha këtu, me këtë organizimin që ka bërë ministria që i menaxhon të gjitha nga qendra aty. Kërkova takim me drejtoreshën nuk e takova dot. Në këtë situatë thashë t’u drejtohem juve”, tha denoncuesi.

Por çfarë i thuhet këtij pacienti kur interesohet për këtë problematikë kur shkon atje?

Stafi mjekësor: Drejtohu drejtorisë, jo mua!

Stafi mjekësor: Po sepse drejtoria e ka…

Pacienti: Mua më thanë, që shefi jeni ju. Unë, shpresat tek ty i kisha.

Stafi mjekësor: Unë të thashë, që nuk varet nga ne, që në fillim.

“Mbesa”: Po u bë gjithë kjo kohë, që gjyshi po i vazhdon, i ka vazhduar mjekimet te privati. Nuk po i përballon dot më.

Stafi mjekësor: Unë dua, që ta vendosim që sot, e dashur, por nuk është nga unë.

“Mbesa”: Po pse nuk është vendosur?

Stafi mjekësor: Po pra, kërkoje në drejtori, e dashur! Janë ca gjëra, që nuk i kemi ne në dorë. Ne, kemi pacientin, që vjen, që e shohim, e vizitojmë, i bëjmë analizat. Po të merreshim me të gjitha, do ta kishim rregulluar edhe Shqipërinë, jo vetëm ortovoltazhin, këtë aparaturën.

Pacienti: Aparaturat kanë ardhur, apo jo? Kanë ardhur aparaturat?

Stafi mjekësor: Aparaturat, po, kanë ardhur.

Drejtoresha e QSUT-së, Albana Fico, thotë se ortovoltazhi i ri ka ardhur, por po bëhet gati bunkeri, që të fillojë trajtimi. Sipas drejtoreshës, ky problem mbyllet brenda Shkurtit.

Albana Fico, dr. QSUT: Ortovoltazhi i ri ka ardhur. Po bëhet gati bunkeri, që të fillojë trajtimi. Këto nuk sistemohen nga inxhinierët shqiptarë.

Gazetari: Të gjitha këto teorikisht duket se janë shumë në rregull.

Gazetari: Duhet të keni parasysh shqetësimin serioz për jetën e një pacienti, i cili mbi të gjitha nuk mundet dot të paguajë privatin.

Albana Fico: Shiko! Unë besoj, se një mjek është shumë herë më i shqetësuar, sesa një gazetar. Unë mendoj, se me datat, që ata na kanë dhënë, kjo gjë mbyllet brenda shkurtit. Pacienti, i cili ka problematika të caktuara, është i lutur të paraqitet pranë shërbimit.

Gazetari: Po është paraqitur ai.

Albana Fico: Po tani, ti e ke fjalë goje? Unë nuk kam një emër. Emrin e pacientit dhe unë do ta ndjek personalisht! Unë nuk kam një emër.

Gazetari: Jo nuk e kam fjalë goje sepse duke folur me gazetarin investigativ e nderuar. Nuk dua ta investigosh, dua ta zgjidhësh drejtoreshë. Këtë nuk e kupton qytetari, ai do shërbimin. Kur do të vihet në funksion drejtoreshë sepse kemi në rrezik jetën e një personi, një qytetari.

Albana Fico: Emrin e pacientit dhe unë do ta ndjek personalisht! Tani, emrin e pacientit dhe unë do ta ndjek personalisht! Më shumë sesa kaq…Por, kur të them, që do ta ndjek personalisht, do ta ndjek personalisht, se për mua si mjeke, çdo pacient është njeriu im.

“Stop” ka mësuar se QSUT ka lidhur kontratë me një operator për rikonstruksionin e ambienteve të reja për ortovoltazhin më 26 Tetor 2023 dhe parashikohej, që punimet të kryheshin për 6 javë, por kjo nuk ka ndodhur.

Në Shqipëri numërohen çdo vit 6000 raste të reja me sëmundje tumorale, përfshirë edhe ato të lëkurës.

KLSH në një raport të vitit 2023 kryer në QSUT është shprehur se “Pas daljes nga funksioni të pajisjes së vjetër, në 2 nëntor 2022, 200 pacientë, që janë të prekur nga tumori i lëkurës nuk e kanë marrë shërbimin me radioterapi”.

KLSH ka bërë direkt fajtore drejtorinë e QSUT për mosgjetjen e kushteve për mosgjetjen e kushteve për vendosjen e aparatit të ri. Nga ana tjetër KLSH në përfundim shprehet se mungesa e infrastrukturës së nevojshme të godinës së pitalit ndikon negativisht në cilësinë e shërbimit të pacientëve duke ulur besimin për një shërbim spitalor të denjë dhe të pastër duke treguar se shërbimi i spitalit onkologjik nuk ka efektivitet të plotë për trajtimin e sëmundjeve tumorale për periudhën në auditim./tvklan