web counter
LEXO PA REKLAMA!

SHKARKO APP

App Store
Google Play

E fundit!

x

Në fermën e blegtorit që i vodhi noterja NIPT-in/ Metushi: Më ka prishur imazhin...

10 Prill 2023, 22:06, Denoncim CNA

Në fermën e blegtorit që i vodhi noterja NIPT-in/ Metushi:

Në 3 Prill të 2023 emisioni “Stop” transmetoi rastin e përkthimeve të noteres së Fierit Anila Haxhiu, e cila përveçse pa licencë përkthimi, u zbulua nga “Stop”, se për këto përkthime përdorte numrin e NIPT-it të qytetarit Pelivan Metushi.

Ky i fundit është fermer dhe nuk ka lidhje me punën e noteres. Për këtë falsifikim noterja Haxhiu rrezikon nga 3 në 7 vite burg. Grupi i xhirimit të “Stop” shkoi në fshatin Suk 1, për të takuar zotin Metushi, i cili tregoi minifermën e tij dhe gjedhët që ka.

Ai tregoi, si u ndje kur zbuloi përmes emisionit “Stop” mashtrimin e noteres.

“E kam nxjerrë numrin e NIPT-it për fermer. E kam filluar me nga një lopë, dy. Kam punuar edhe me pemtari. Atë (përkthyesin) ma kanë sjellë me të hedhur. Unë kam 37 lopë kam edhe viçat e lopëve. Kjo është puna ime, marr jonxhën këtu dhe ia hedh lopëve. S’kam lidhje me përkthimet. As anglist, as gjermanisht, as italisht. Dhe greqisht që the ti, e flas më shumë për modesti, por faktikisht nuk di fare. Me këtë NIPT kam që në 2007. Nuk isha në dijeni fare. I kam thënë ekonomistit m’i hidh në sistem mos haj ndonjë gjobë”, u shpreh Metushi.

“Atë natë që doli emisioni një shok nga Anglia më ka marrë për të më provokuar më ka thënë, ku paske qenë ti që dinke anglisht e gjermanisht dhe si nuk më ke përkthyer mua që unë kam vajtur sa herë”, tha Pelivan Metushi.

Më tej ai shtoi: Nuk do ta le me kaq. Do ta denoncoj. Më ka prishur imazhin sepse sa shkoj në lokal më thonë hajde ti o përkthyes.  

Bashkë me Pelivan Metushin, “Stop” iu drejtua Komisariatit të Policisë Fier, për të bërë kallëzim për noteren Anila Haxhiu. Oficeri i Policisë Gjyqësore, Ervin Sorra, mori kallëzimin dhe deklarimin e Metushit, si dhe pamjet filmike të emisionit.

Nga ana tjetër studio Ligjore “Jurispundenca” do të merret me ndjekjen ligjore të këtij rasti, në ndihmë të Pelivan Metushit.

“E marrim përsipër për ta ndjekur si rast. Përveç kallëzimit që ky shtetas ka depozituar pranë policisë Fier, të ndjekim penalisht noteren që ka marrë në mënyrë të padrejtë NIPT-in e zotit Pelivan Metushi. Hetimi do të ndiqet nga ne hap pas hapi”, tha avokati Llangozi.

Metushi ishte dhe në studion e “Stop”, ku foli për këtë ngjarje të pazakontë, ku është përfshirë pa dashje dhe pa dijeni./tvklan





Lajmet e fundit nga