E fundit!

18:12 Aktualitet

Nis protesta e pestë e qytetarëve në Tiranë

Mbahet ditën e sotme protesta e radhës e qytetarëve në Tir...

Udhëtimet: Pse na pëlqejnë dhe pse kanë efekte pozitive mbi ne

1 Korrik 2022, 09:15, Blog CNA

Udhëtimet: Pse na pëlqejnë dhe pse kanë efekte pozitive mbi

Foto ilustruese

Ekzistojnë shumë arsye pse na pëlqen të udhëtojmë. Por sipas ekspertëve, motivimi kryesor për të udhëtuar është arratisja, braktisja e rutinës, së zakonshmes, përditshmërisë. Shumëkush ka vuajtur shumë nga pamundësia për të lëvizur lirshëm gjatë pandemisë së COVID-19, e cila për më tepër e ka theksuar dëshirën për t’u arratisur dikur larg me pushime.

Arratisje nga stresi

Psikologia amerikane, Karla Menli, e shpjegon shumë mirë motivimin që fshihet pas udhëtimeve: ”Kur përjetoni përvoja traumatike, përpiqeni që t’i ikni realitetit, për të shmangur vuajtjen e mëtejshme psikologjike. Por për shkak të kufizimeve, shumë njerëz që e përdornin zakonisht udhëtimin si një mënyrë për të shpëtuar nga stresi, nuk ishin në gjendje që ta bënin këtë. Kjo i ka bërë shumë njerëz të ndihen të shqetësuar, të burgosur, ndonjëherë edhe të zemëruar”.

Por jo vetëm kaq. Pandemia na ka nxitur edhe të ndryshojmë zakonet tona të udhëtimit. Siç raportohet nga të dhënat e paraqitura së fundmi nga Shoqata Kërkimore Ndërdisiplinore e Psikologjisë së Turizmit, disa dinamika të reja do të zbehen me fundin e pandemisë (nga pushimet vetëm në ambiente të hapura deri te zgjedhja e destinacioneve të afërta), por të tjerat duket se janë të destinuara të mbeten.

Një shembull është përzierja e pushimeve me punën, e mundësuar nga puna në distancë.

Por cilat janë përfitimet kryesore nga udhëtimet? Ekspertët bien dakord për këto 5 elemente thelbësore:

1. Rritja e vetëbesimit

Tejkalimi i vështirësive të vogla, vënia në dyshim e aftësive vetjake, përballja me njerëz dhe kontekste të ndryshme e përmirëson vetëvlerësimin, ndihmon për t’u njohur më mirë me njëri-tjetrin, dhe më pas për t’u përballuar me qetësi më të madhe me problemet e jetës së përditshme.

2. Ju hapin mendjen ndaj diversitetit

Kur udhëtoni dhe përjetoni eksperienca me njerëz dhe vende që janë shumë të ndryshme nga ato të zakonshmet, bien stereotipet e zakonshme. Për pasojë bëheni më pak paragjykues, dhe më të hapur ndaj së resë dhe të ndryshmes.

3. Redukton stresin

Pushimi nga punët e përditshme e ul menjëherë presionin dhe stresin. Efekti është sigurisht edhe më i dukshëm duke zgjedhur një destinacion, ku mund të jeni në kontakt me natyrën.

4. Ju bëjnë më kreativ

Udhëtimet janë një terren stërvitor për trurin, pasi ju detyrojnë të përshtateni me mjediset, gjuhët, zakonet e reja. Në këtë mënyrë, ju arrini të zhvilloni të menduarit anësor, që nga ana e tij ju ndihmon për të gjetur zgjidhje të reja për problemet e ndryshme. Pra, është një nxitës i mirë i të qenit kreativ.

5. Ndihmon në zhvillimin e aftësive njohëse

Nevoja për të organizuar, rezervuar apo thjesht për të imagjinuar zgjidhjen dhe adresimin e problemeve me itinerarin e udhëtimit, ju ndihmon të keni aftësi të dobishme njohëse për të përmirësuar kontrollin mbi ngjarjet edhe kur nuk jeni duke udhëtuar.

Përkthyer dhe përshtatur nga CNA.al