web counter
LEXO PA REKLAMA!

SHKARKO APP

App Store
Google Play

E fundit!

x

Zjarrvëniet e qëllimshme/ Dom Gjergj Meta: Krim që kërkon përgjigje para Zotit dhe njerëzve

13 Gusht 2025, 13:07, Aktualitet CNA
Zjarrvëniet e qëllimshme/ Dom Gjergj Meta: Krim që kërkon
Presidenti i KISH, Dom Gjergj Meta

Presidenti i KISH, Dom Gjergj Meta, u ka bërë një thirrje qytetarëve dhe institucioneve sa i përket situatës së zjarreve në vend.

Përmes një deklarate për shtyp, Dom Gjergj Meta thekson se ata që vënë zjarre me qëllim bëjnë një krim që kërkon përgjigje para njerëzve dhe Zotit.  

Dom Gjergj Meta u bën thirrje individëve dhe institucioneve të përballen me situatën me veprime konkrete dhe shqyrtimin e ndërgjegjes në mënyrë që të dalin nga situata dhe të mos krijohen të tjera.

Deklarata e plotë e Dom Gjergj Metës

NJË THIRRJE NGA ZEMRA

Zjarret që në këto ditë po rrezikojnë jetën e banorëve, shtëpitë e tyre, florën dhe faunën që gjendet në male dhe në pyje, në pjesën më të madhe janë të qëllimshme. Ky është një krim që kërkon përgjigje para njerëzve e para Zotit.

Krijimi na është dhënë në roje dhe jo për ta prishur apo për të abuzuar me të duke e shkatërruar. Zjarret rrezikojnë edhe mundin dhe djersën e shumë njerëzve dhe familjeve të tyre. Kemi përgjegjësi të gjithë për të ruajtur si sytë e ballit çdo pëllëmbë vend tonin nga shkatërrimi.

Edhe në emër të të gjithë ipeshkvijve, ju bëj thirrje nga zemra të gjithëve, individë dhe institucione, të përballemi me situatën me veprime konkrete, por sidomos me shqyrtimin e ndërgjegjes sonë, në mënyrë që të dalim nga këto situata e të mos krijojmë të tjera.

Përgjegjësve u them se një ditë do të japim llogari para Zotit. Askush nuk ia ka pa hajrin abuzimit me ambientin, shkatërrimit të tij, pasi është njëkohësisht edhe shkatërrimi ynë e i së ardhmes sonë mbi planet. Thirrini zërit të ndërgjegjes, ndaleni dorën tuaj! Dërguesit dhe dorasët kanë përgjegjësi njësoj para njerëzve e para Zotit.

Për këtë kanë përgjegjësi edhe organet shtetërore që të mos jenë neglizhente, por të forcojnë ruajtjen e pyjeve, të përmirësojnë dhe përforcojnë strukturat me mjete ndërhyrëse. Të merret më seriozisht kjo gjë se vjen shpejt edhe viti tjetër e duhet të shkojmë përtej retorikave.

Zoti e bekoftë çdokënd që e ka për zemër ruajtjen e mjedisit, të gjithë ata që në këto ditë po luftojnë me zjarret e qoftë pranë të dëmtuarve nga flakët. Me shpresën se sadopak këto fjalë do të dëgjohen i uroj secilit paqe në zemër e dashuri për këtë vend, për Shqipërinë tonë, që e kemi shumë të shtrenjtë./ CNA





Lajmet e fundit nga