web counter
LEXO PA REKLAMA!

SHKARKO APP

App Store
Google Play

Vijojnë tensionet në aeroportin e Vlorës/ Vendosen kamionë në hyrje të kantierit

23 Qershor 2026, 08:45, Aktualitet CNA

Në kantierin e aeroportit të Vlorës vijojnë tensionet mes dy palëve të përfshira në konflikt për këtë çështje, ata të “2A Group” dhe “MABCO”. Sipas raportimeve, paraditen e sotme kamionët e kompanisë “2A Group”, kanë bllokuar hyrjen në kantier për punonjësit dhe nënkontraktorët e kompanisë së Behgjet Pacollit.

Raportohet po ashtu se ka pasur përplasje verbale dhe momente tensioni mes punonjësve që tentonin të hynin në kantier dhe përfaqësuesve të sigurisë së kompanisë që aktualisht administron hyrjen në aeroport.

Bëhet me dije se në zonë ndodhen edhe forcat e Policisë së Shtetit. Tensionet dhe përplasjet kanë nisur që paraditen e djeshme kur, punonjësit e “MABCO” hynë brenda kantierit dhe tentuan të nxjerrin nga zyra ata të “2A Group” të Valon Ademit.

Lidhur me situatën reagoi edhe biznesmeni Behgjet Pacolli ku i bënte thirrje SPAK-ut të nisë hetime të plota mbi atë që ai e cilëson si “skandal të rëndë të nisur nga individë që veprojnë në kundërshtim me ligjin”.

Ai shkruante se punonjësit e "MABCO"-s dhe nënkontraktorët e saj janë rikthyer në kantier, ku, sipas tij, po kryhet verifikimi dhe evidentimi i dëmeve të shkaktuara gjatë kësaj periudhe.

Biznesmeni tha se është e rëndësishme që institucionet kompetente të marrin masa për të parandaluar çdo përshkallëzim të mundshëm të situatës dhe për të garantuar sigurinë e punonjësve dhe të kompanive kontraktuese.

Kujtojmë se më 5 qershor Gjykata e Shkallës së Parë Tiranë vendosi të ngrijë situatën aktuale të kompanisë VIA sh.p.k., deri në marrjen e një vendimi të formës së prerë.

Sipas vendimit, ndalohet çdo vendimmarrje, veprim juridik ose regjistrim që ndryshon ose ushtron të drejta mbi një raport zotërimi kuotash të ndryshëm nga ai që rrjedh nga Kontrata e Shitblerjes së Kuotave sipas së cilës, "Mabco" zotëron 51% të kuotave dhe "2A Group" zotëron 49%. /CNA





Lajmet e fundit nga