Ministri i Kulturës me gjuhë skandaloze ndaj artistit

22 Qershor 2026, 14:38, Aktualitet CNA

Ministri i Kulturës, Blendi Gonxhja, me një gjuhë skandaloze shumë larg asaj të një ministri, i drejtohet me tone fyese dhe linçuese një artisti.

Në këtë rast bëhet fjalë për tenorin Armaldo Kllogjeri. Për shkak të pjesëmarrjes së këtij të fundit në protestë dhe akuzave për heqje nga puna, Gonxhja ka publikuar një foto të Kllogjerit ku tregohet edhe gjuha fyese e përdorur ndaj tij.

“Zotëria jote ishte pjesë e një institucioni si Teatri Kombëtar i Operës dhe Baletit, ku paguheshe me taksat e shqiptarëve për të kënduar, por e le punën dhe ike në një 'reality show' për të urinuar para kamerave. Mbasi mbarove urinimin deshe të rikthehesh në Opera, po kjo nuk kishte si të ndodhte dhe prandaj ti nuk do që Shqipëria të futet në BE, sepse në BE tenorët nuk paguhen për të urinuar në publik, po për t’i dhuruar publikut emocionet e artit klasik”, shkruan Gonxhja.

Ministri i Kulturës me gjuhë skandaloze ndaj artistit

Ky veprim është dënuar nga deputetja e Partisë Demokratike, Albana Vokshi, përmes një reagimi në rrjetet sociale.

Vokshi shkruan se sulmi i ministrit ndaj artistit Kllogjeri është një akt i turpshëm dhe i dënueshëm. Sipas saj, ai është dëshmi e qartë e arrogancës së pushtetit në ikje.

Postimi i plotë:

Si mund të ndodhte ndryshe?

Nuk janë në pushtet falë meritës apo votës së lirë por falë aleancës me krimin e organizuar, patronazhimit, frikësimit të qytetarëve dhe kapjes së shtetit. Ndaj sot guxojnë të sulmojnë artistë, gazetarë dhe çdo qytetar të lirë që nuk i bën fresk e nuk i këndon pushtetit dhe nuk duartroket dështimet e tij.

Sulmi i ministrit Blendi Gonxhja, linçimi publik, etiketimet dhe sulmet personale ndaj Maestros Armaldo Kllogjeri, një artisti të njohur ndërkombëtarisht, vetëm pse mori pjesë në protestë dhe kërkoi dorëheqjen e Kryeministrit, është një akt i turpshëm dhe i dënueshëm. Ai është dëshmi e qartë e arrogancës së pushtetit në ikje.

Ora e llogaridhënies po afron!

Do të jepni llogari për cdo votë të dhunuar, për korrupsionin galopant, për largimin masiv të të rinjve, për kapjen e institucioneve, për lidhjet me grupet kriminale dhe për shkatërrimin e standardeve demokratike në vend.

Shqipërinë europiane do ta ndërtojnë njerëzit e lirë, ata që vrarë frikën dhe sot po mbushin sheshet në Shqipëri dhe kudo në botë për të rrëzuar regjimin. /CNA