web counter
LEXO PA REKLAMA!

SHKARKO APP

App Store
Google Play

Kërkesat e protestuesve/ Aktivisti: Ultimatumi ndaj kryeministrit nuk ka qenë nga ne

22 Qershor 2026, 21:49, Aktualitet CNA

Kërkesat e protestuesve/ Aktivisti: Ultimatumi ndaj kryeministrit nuk ka

Aktivisti Andi Tepelena në një prononcim live për emisionin “Now” me Erla Mëhillin ka thënë se nuk ka një ultimatum ndaj kryeministrit Rama.

Tepelena tha se ultimatumi nuk ka qenë i iniciuar nga grupi koordinues i protestës.

Aktivisti u shpreh se Rama do të jetë i detyruar të japë dorëheqjen dhe të dëgjojë vullnetin e popullit.

Më tej, në prononcimin e tij, aktivisti tregoi se grupet e interesit në protestë do të krijojnë një asamble qytetare me përfaqësues që do të shërbejë për një qeveri teknike.

 

“Ne grupi koordinues bëmë sot një hap të parë. Nuk kemi bërë ultimatum ndaj kryeministrit Edi Rama. Në rrjetet sociale ka kakofoni mesazhesh, por kjo është një lëvizje e decentralizuar, horizontale, e përbërë nga qindra grupe sociale. Ultimatumi nuk ka qenë e iniciuar nga grupi koordinues i protestës. Ky është një proces deri sa ai të japë dorëheqjen. Do të jetë një proces i gjatë, pak i lodhshëm, por në fund të tunelit do të ketë dritë. Edi Rama do të jetë i detyruar të japë dorëheqjen dhe të dëgjojë vullnetin popullor. Ky shesh do të shërbejë si hambar idesh. Ky shesh është i përfaqësuar nga grupe të ndryshme interesi si ekonomia, ligjet, siguria, mjedisi, kultura dhe të tjera. Këto grupe interesi do të konsultohen mes tyre, do të nxjerrin përfaqësues dhe do të krijojmë një asamble qytetare, e cila do të përmbajë përfaqësues të këtyre grupeve të interesit. Do të jetë një proces sa më demokratik, ku të përfshihet çdo qytetar dhe çdo grup interesi, ku do të sjellin problematikat që kanë dhe rrugëzgjidhjet përkatëse. Do të jetë një laborator idesh, krahas kërkesës për dorëheqjen e panegociueshme të kryeministrit. Kryesisht do të jemi të orientuar drejt njerëzve jo partiakë në këtë fazë, e cila do të shërbejë në funksion të një qeverie teknike që ne kërkojmë të jetë jo partiake, të paktën për një periudhë njëvjeçare, për të bërë një kod zgjedhor të duhur dhe që partitë e vjetra dhe të reja të reformohen brenda një viti. Tentativat për përçarje nuk i marrim seriozisht. Këtu janë të ftuar të gjithë qytetarët, pavarësisht përkatësisë politike. Feja e shqiptarëve është shqiptaria. Çdo tentativë përçarjeje është e kotë dhe do të dështojë. Njerëzit janë çdo ditë në shesh, dhe nesër do të ketë protestë nga sindikatat. Çdo ditë do të ketë risi që do ta fuqizojnë protestën, për të arritur objektivin që të dalin në shesh 1 milion shqiptarë. Dhe atëherë nuk do të ketë Ramë që t’i bëjë ballë 1 milion shqiptarëve që do të jenë aty për të kërkuar dorëheqjen. Ky do të jetë një moment kur e gjithë Shqipëria do të jetë në shesh për të kërkuar dorëheqjen, dhe nuk do të jetë i largët. Qytetarët shqiptarë duhet të kenë besim. Ky është një proces pa kthim”, tha Tepelena.





Lajmet e fundit nga