E fundit!

12:57 Aktualitet

“F*ck you”/ PDE "shuplakë" Ramës: Sheshi duhet dëgjuar, jo fyer

Partia Demokratike Europiane ka reaguar pas intervistës së...

VIDEO/ Të ecësh mes gurëve mbi greminë, rruga Prekal-Kir kthehet në rrezik për banorët, asnjë ndërhyrje nga autoritetet

18 Tetor 2023, 10:18, Aktualitet CNA

Rruga Prekal-Kir

Rruga Prekal-Kir, në zonën e Dukagjinit është kthyer në një rrezik jete për banorët e zonës.

CNA siguron pamje nga aksi rrugor, tashmë i shkatërruar, ku banorëve të zonës u duhet të ecin mes gurëve, mbi një greminë për të shkuar në fshat. Pothuajse është e pamundur për të transportuar persona të sëmurë, apo fëmijë.

Edhe pse ka rreth një javë që në këtë aks humbi jetën drejtuesi i ekskavatorit të një firme teksa po punonte, ende nuk janë marrë masa nga autoritetet. Kjo rrugë është një burim aksidentesh të rrezikshme.

Banorët e zonës shprehen të shqetësuar, pasi çdo ditë u rrezikohet jeta teksa kalojnë rrugën, ku një pjesa më e madhe e saj ka pësuar rrëshqitje, duke u kthyer në një greminë.

Me automjete banorët mbërrijnë deri tek rruga e dëmtuar, e kalojnë atë me shumë kujdes në këmbë dhe më pas marrin automjetet dhe shkojnë për në fshat.

Thirrja e vetme shkon për autoritetet, të cilat edhe pse kanë më shumë se 1 muaj që ka nisur ndërtimi i rrugës, nuk po marrin masa.

Pak ditë më parë, kryeministri Rama përmes një postimi në facebook, ndau pamje nga rruga, e cila do të ketë një gjatësi prej 17 km. Kreu i qeverisë theksoi se ky aks do lehtësojë qarkullimin e mjeteve jo vetëm për banorët e zonës, por edhe për turistët e shumtë që do të zbulojnë Dukagjinin.

Por në fakt, deri më tani asnjë nga premtimet e kryeministrit nuk janë realizuar.

Ky është një projekt i hartuar nga Fondi Shqiptar i Zhvillimit që financohet nga qeveria me vlerë prej 200 milionë lekë.

Ajo që vlen të theksohet është se ky projekt ka si objekt mbrojtjen nga rrëshqitjet dhe ndërtimin e veprave të artit përgjatë këtij segmenti me gjatësi 17 km, por mesa duket situata ka dalë jashtë kontrollit./CNA