E fundit!

08:49 Kronika

Vrasja e efektivit në Maliq/ Detaje të reja, zbardhen emrat dhe rrethanat e ngjarjes

Zbardhen detaje të reja lidhur me ngjarjen e rëndë të mëng...

Vendimi i gjykatës për protestuesit/ Deputeti i PD-së: Arrestimet ishin të paligjshme, policia do të mbajë përgjegjësi për veprimet

27 Janar 2026, 15:47, Aktualitet CNA

Gjykata e Tiranës ka zbutur masat e sigurisë për 19 protestuesit e arrestuar në protestën e 24 janarit para Kryeministrisë. Gjykata caktoi ndaj tyre masën e sigurisë “detyrim me paraqitje”, duke rrëzuar masat më të rënda të kërkuara më herët.

Lidhur me vendimin, deputeti Klevis Balliu tha në një deklaratë për mediat se arrestimi i protestuesve ishte i paligjshëm, ndërsa u shpreh se policia do të mbajë përgjegjësi për veprimet e saj.

"Arrestimi i patolerueshëm, kriminal, terrorist, i një 10-vjeçari, i cili u mor zvarrë nga 5 narkopolicë të Ilir Prodës, që është një turp për Policinë e Shtetit dhe gjithë shtetin, faktoi përfundimisht se këta të kapur nga frika që i ka pllakosur, nuk dinë më çfarë bëjnë aq sa shoqëruan dhe arrestuan edhe një njeri të vetin, që ishte pjesë e strukturave të PS-së. Sepse këta nën frikën e sovranit nuk shikojnë më nga sytë. I garantoj se për dhunën dhe gazin e hedhur në rrugët e Tiranës, ata do të mbajnë përgjegjësi direkte", deklaroi Balliu.

Jashtë gjykatës, foli edhe avokatja Eda Grimci, e cila tha se nuk kishte asnjë provë që faktonte veprimet penale. Ajo shtoi se provat e marra nuk kishin asnjë lidhje me të arrestuarit.

"Pasi u njohëm me dosjet, pamë që nuk kishte asnjë provë ndaj tyre. Bëhej fjalë për prova të marra nga pamje filmike, që nuk kishin lidhje me të arrestuarit. Por edhe kjo ishte vetëm për 5 raste, për 14 raste të tjera nuk kishte as pamje filmike, as foto, por kishte vetëm një raport shërbimi ku në një rast firmosin 4 oficerë policie dhe në një rast 7 vetë dhe këto konsideroheshin si provë. Por këto nuk mund të konsiderohen të tilla, pasi në një vendim të Gjykatës së të Drejtave të Njeriut kundër Shqipërisë, ka saktësuar se masat nuk duhet të tejkalojë faktin dhe në asnjë rast nuk mund të konsiderohet e ligjshme, dhe nuk mund të kërkohet ‘arrest me burg’ kur nuk ka asnjë provë që fakton veprimin konkret. Bëhej fjalë për dyshime", tha avokatja. /CNA