web counter
LEXO PA REKLAMA!

SHKARKO APP

App Store
Google Play

E fundit!

x

Vendimi i Gjykatës Kushtetuese është një lojë e Edi Ramës

4 Nëntor 2025, 14:31, Aktualitet CNA

Vendimi i Gjykatës Kushtetuese është një lojë e Edi

Kryeministri Edi Rama, në Asamblenë e Partisë Socialiste më 11 shtator, urdhëroi shkarkimin e Erion Veliajt nga detyra e kryebashkiakut. Më pas u mblodh Këshilli Bashkiak i Tiranës, propozoi shkarkimin e Erion Veliajt, propozim i cili më pas u miratua nga Këshilli i Ministrave.

Më pas, Presidenti i Republikës, i zgjedhur nga vetë Rama, dekreton datën e zgjedhjeve vendore, ndërsa nuk ishte dëgjuar Erion Veliaj. Hyn Gjykata Kushtetuese në themel, rrëzon shkarkimin e Erion Veliajt dhe e rikthen atë në detyrë.


E kujt është kjo lojë? E Edi Ramës dhe askujt tjetër. Pse është e Edi Ramës? Lehtësisht e Edi Ramës, sepse është ky Edi Rama që e sulmoi SPAK-un në mënyrë kaq të ashpër për arrestimin e Erion Veliajt.

Kujtojmë këtu si qante Klotilda Bushka, ndërkohë që e kapën duke prishur prova, apo si merrte rektorin e UBT-së dhe na mbante leksione për demokracinë. Ndërkohë që SPAK-u kishte bërë detyrën.

Vendimi i Gjykatës Kushtetuese nuk është gjë tjetër veçse lojë e Edi Ramës. Biles vendimi që ka dhënë Gjykata Kushtetuese tregon se sa e kapur është kjo gjykatë nga kryeministri.

Megjithëse gazetari i familjes së Veliajt, Mero Baze, na thotë se kemi një Gjykatë të Lartë të kapur nga PS-ja, Edi Rama mban distancë. Në fakt kemi Gjykatë Kushtetuese të kapur nga Edi Rama dhe pa mbajtur distancë fare. Për më tepër, nga informacionet që ka CNA, janë përfshirë shumë deputetë të Partisë Socialiste. Pa folur këtu për marrëdhënien Mero Baze, Sokol Sadushi, Fatmir Xhafaj e më tej.

Gjykata Kushtetuese është një instrument i kapur që bëri shërbimin më të mirë për Erion Veliajn, i cili ndenji disa kohë në burg dhe tani po kjo gjykatë do të përdoret për ta nxjerrë nga burgu. Ndërsa fakt është se nuk ka ndryshuar asnjë rrethanë në lidhje me akuzat ndaj Erion Veliajt për korrupsion dhe kryerjen e veprave më të rënda penale, që ky i fundit të lirohet. Megjithëse Edi Rama e bëri lojën e tij deri në fund, vendimi i Gjykatës Kushtetuese është një lojë e Edi Ramës dhe vetëm e tij.

Për ata që duan ta kuptojnë se cili është ndikimi i qeverisë, si ka mundësi që përfaqësuesit e saj në Gjykatë Kushtetuese nuk kërkuan përjashtimin e Marsida Xhaferllarit, kur bashkëjetuesi i saj, Enkelejd Alibeaj, doli në media dhe tha se Gjykata Kushtetuese duhet të rrëzojë shkarkimin e Erion Veliajt. CNA në redaksionalen e saj tërhoqi vëmendjen për këtë skandal.

Ky është një fakt kuptimplotë. Në qoftë se do të ishte kërkuar përjashtimi i zonjës Xhaferllari, që në bazë të ligjit duhet të përjashtohej, pasi bashkëjetuesi, bashkëshorti i saj, foli publikisht dhe e njoftoi në njëfarë mënyre vendimin, Kushtetuesja do të gjendej në pamundësi për të marrë vendim.

Në rast se do të ishte kërkuar largimi i gjyqtares Xhaferllari, Gjykata Kushtetuese mbetej pa kuorum dhe pa një vendim për çështjen "Veliaj". Por edhe qeveria nuk e kërkoi përjashtimin e Xhaferllarit, e cila u kap mat në konflikt interesi. Dhe përtej asaj që Edi Rama thotë: “Unë nuk e kam kapur drejtësinë dhe Gjykatën Kushtetuese”, në fakt ai i “tredh” dhe i "mjel" kur do dhe si do ai./CNA





Lajmet e fundit nga