Sonte, reportazhi i RAI3 për Shqipërinë/ Ramës nuk i del e keqja me gazetarët

2 Qershor 2024, 16:01, Aktualitet CNA

Mbrëmjen e sotme, media italiane “RAI3” do të transmetojë mbrëmjen e sotme episodin e dytë të dokumentarit për Shqipërinë, ku do të jetë pjesë edhe kryeministri Edi Rama.

Kreu i qeverisë ka reaguar në rrjetet sociale për këtë intervistë, që sipas tij vjen pas përzierjes në të njëjtin kazan, të sherreve politike italiane me llumin e eksportuar nga Tirana.

Rama sqaron se transmetimi i intervistës është kërkuar nga vetë ai, nëpërmjet një ftese publike, drejtuar drejtorit të “Report”.

Ai “shigjeton” sërish emisionin, teksa deklaron se intervista e tij do të pritet, shqepet dhe qepet sipas skenarit të gazetarëve.

Sonte, reportazhi i RAI3 për Shqipërinë/ Ramës nuk i del e

“E dua Giorgion por dua më shumë të vërtetën”

Sonte 20:00

“RAI3 Report” bëri para disa javësh një reportazh ku përzieu në të njëjtin kazan prodhimet e sherrit politik italian mbi marrëveshjen Itali-Shqipëri për qendrën e pritjes së tremijë migrantëve në Shëngjin, me llumin e eksportuar nga kanalet e ujrave të zeza politike e mediatike të Tiranës, duke cënuar imazhin e Shqipërisë dhe dinjitetin e shqiptarëve. Dihet “lufta” që pasoi e që u bë temë e mediave italiane pas kundërvënies sime ndaj asaj llumnaje.

Drejtori i programit “Report” iu përgjigj pozitivisht ftesës sime publike drejtuar atij personalisht, për të ballafaquar faktet në sytë e audiencës së RAI3. Ramë dakord, që përveç copave të intervistës së bërë në zyrën time, të cilat ata do t’i presin, shqepin dhe qepin sipas skenarit të tyre (me qëllimin lehtësisht të lexueshëm të vazhdimit të përzierjes në të njëjtin kazan të sherrnajës politike italiane me llumin e eksportuar nga Tirana) intervista e pacensuruar do të publikohet njëkohësisht në rrjetet sociale të Report, si edhe këtu në këtë faqe.

Sonte në mbrëmje shikoni, dëgjoni e gjykoni vetë, unë s’po bëj asnjë koment. Nesër flasim, këtu jemi prapë.

*Kujdes e kam fjalën për Giorgio-n, gazetarin në foto, jo për Giorgia-n, shënjestrën kryesore të “RAI3 Report””, shkruan kreu i qeverisë./ CNA