web counter
LEXO PA REKLAMA!

SHKARKO APP

App Store
Google Play

E fundit!

x

Sondazhi/ A e mbështesni kreun e ri të SPAK-ut Klodjan Brahon?

22 Dhjetor 2025, 11:10, Aktualitet CNA

Sondazhi/ A e mbështesni kreun e ri të SPAK-ut Klodjan Brahon?

Më 11 dhjetor, Këshilli i Lartë i Prokurorisë zgjodhi pasuesin e Altin Dumanit në krye të SPAK-ut, prokurorin Klodjan Braho.

Prokurori Klodjan Braho mori 7 vota, Adnan Xholi 3 vota, Elvin Gokaj 1 votë dhe Doloreza Musabelliu asnjë votë.

Sot u zhvillua dhe ceremonia zyrtare e dorëzimit të detyrës nga Dumani i cili i kaloi stafetën Klodjan Brahos duke shprehur dhe bindjen se, do të trashëgonte dhe vazhdonte eksperiencën 6-vjeçare të prokurorëve të mëparshëm të SPAK-ut.

CNA ka hapur një sondazh ku pyet qytetarët : A e mbështesni kreun e ri të SPAK-ut, Klodjan Brahon?

Për të shprehur mendimin tuaj mund të zgjidhni një nga alternativat e mëposhtme: Po, Jo, Nuk e di.

Poll

Braho është drejtuesi i tretë i SPAK-ut, që prej themelimit të institucioneve të reja të drejtësisë. Dy paraardhësit e Brahos janë Altin Dumani dhe Arben Kraja.

Klodjan Braho lindi në Skrapar më 21 korrik 1982. Në vitet 2000-2004 kreu studimet në Fakultetin e Drejtësisë dhe në 2005-2008 studioi në Shkollën e Magjistraturës. Mori emërimin më 14 nëntor 2007.

Më parë ka mbajtur këto detyra:

14.11.2007-2012/ Prokuror pranë Prokurorisë së Gjykatës së Rrethit Gjyqësor Berat.

2012-2015/ Prokuror pranë Prokurorisë së Gjykatës së Rrethit Gjyqësor Vlorë.

2014-2015/ Zv.drejtues i Prokurorisë pranë Gjykatës së Rrethit Gjyqësor Vlorë.

2015-19.12.2019/ Prokuror në Prokurorinë pranë Gjykatës së Shkallës së Parë për Krimet e Rënda Tiranë.

Dosjet e hetuara

Emri i prokurorit Klodjan Brahos rezulton në disa prej dosjeve më të nxehta të hetuara nga Prokuroria e Posaçme. Konkretisht Braho është prokurori që hetoi aferën e inceneratorit të Elbasanit dhe kërkoi urdhër-arrestet për personat e përfshirë në këtë aferë.

Gjithashtu ishte Braho njëri prej prokurorëve që vendosi të ndante hetimin për Arben Ahmetajn në lidhje me hetimet për inceneratorin e Elbasanit.

Klodjan Braho është prokurori i dosjes së famshme “5D”, dosje në të cilën dërgoi në gjyq ish-zyrtarë të Bashkisë Tiranë të akuzuar për vepra të rënda penale.

Prokurori Braho është po ashtu prokuror i çështjes “Toyota Auris”, dosje e cila vijon të jetë nën hetim.

Kreu i SPAK, Braho ka qenë pjesë e hetimeve për ish-kryeprokurorin Adriatik Llalla./ CNA





Lajmet e fundit nga