Situata e motit në Qarkun Shkodër/ Uji deri në 40 cm, 15 familje të bllokuara

7 Janar 2026, 09:45, Aktualitet CNA

Situata e motit në Qarkun Shkodër/ Uji deri në 40 cm, 15 familje

Territori i Qarkut Shkodër është një ndër më të prekurit nga reshjet e dendura të shiut të ditëve të fundit.

Në territorin e Bashkisë Shkodër, reshjet e shiut kanë pushuar prej disa orësh dhe deri në këto momente nuk raportohen situata emergjente. Ka prani të ujit në disa zona të tokave bujqësore dhe në oborre banesash në të njëjtat zona. Grupet e punës vijojnë monitorimin dhe punën në terren, veçanërisht në zonat me risk më të lartë.

Në zonën e Obotit, në rrugën kryesore evidentohet prezencë uji rreth 30–40 cm, çka lejon qarkullimin vetëm për mjete të larta. Gjithashtu, ka prezencë uji në disa oborre banesash dhe në sipërfaqe toke bujqësore.

Në Bashkinë Vau i Dejës, gjatë mbrëmjes së kaluar janë regjistruar reshje shiu me intensitet mesatar. Përroi i Glinës po shfaq tendencë rënieje të nivelit të ujit. Edhe përroi i Gjadrit ka shënuar rënie të nivelit të ujit dhe situata vijon të monitorohet nga strukturat e Emergjencave Civile. Në Njësinë Administrative Bushat, në fshatrat Mali i Jushit dhe Hoten, është raportuar se rreth 15 familje janë të bllokuara për shkak të prezencës së ujit, ndërkohë që strukturat vendore janë në gatishmëri dhe ndjekin nga afër situatën në terren.

Në Bashkinë Malësi e Madhe, gjatë natës janë regjistruar reshje shiu me intensitet të ulët, pa problematika të raportuara. Situata paraqitet e qetë dhe nën monitorim të vazhdueshëm. Në fshatin Kamicë, përroi i thatë është tërhequr nga rruga.

Në territorin e Bashkisë Fushë-Arrëz vijojnë reshje shiu me intensitet të ulët, ndërsa si pasojë e reshjeve të shumta të ditëve të mëparshme janë evidentuar shkarje dherash, rënie gurësh dhe prezencë uji në disa akse auto-rurale. Rrugët mbeten të hapura për qarkullim dhe po punohet për pastrimin dhe rikthimin e situatës në normalitet.

Në Bashkinë Pukë, aktualisht vijojnë reshje intensive shiu të shoqëruara me erë të fortë, pa problematika apo emergjenca civile të raportuara deri në këto momente. Situata po monitorohet në mënyrë të vazhdueshme.

Sipas të dhënave të Drejtorisë së Ujitjes dhe Kullimit Lezhë, niveli i ujit në Urën e Bunës është 1.80 m, niveli i Liqenit të Shkodrës ndodhet në kuotën 7.7 m dhe niveli në Dajç në kuotën 6.2 m. /CNA