Siguria ushqimore/ Muçollari, shuplakë AKU-së dhe Ministrisë së Bujqësisë

25 Dhjetor 2024, 11:49, Aktualitet CNA

Siguria ushqimore/ Muçollari, shuplakë AKU-së dhe

Anëtari i Kryesisë së PD-së, Grigels Muçollari

Anëtari i Kryesisë së PD-së, Grigels Muçollari, ka folur për sigurinë ushqimore dhe rastin e fundit me mandarinat me pesticide.

Muçollari theksoi se të gjitha institucionet që janë përgjegjëse për sigurinë ushqimore, Ministria e Bujqësisë, AKU apo edhe institucione të tjera, nuk ekzistojnë në këtë aspekt.

Ai tha se këto institucione çedojnë shumë në funksionet e tyre të kryerjes së detyrave.

Muçollari nënvizon se AKU e ka detyrim ligjor të komunikojë rrezikun për produktet, të cilat qytetarët shqiptarë nuk duhet t’i konsumojnë. Sipas Muçollarit, AKU nuk ka asnjë laborator të certifikuar që t’i përpunojë sa më shpejt të dhënat dhe të asistojë fermerët.

Nga ana tjetër Muçollari deklaron se Ministria e Bujqësisë as nuk kontrollon, as nuk subvencionon dhe as nuk jep ndihmë që fermerët të bëjnë produkte sa më të mira.

“Kemi të bëjmë me një problem që nuk lidhet vetëm me një ngarkesë mandarinash. As me një, dy, tri, apo katër raste të cilat mund të jenë produkte importi dhe me problematika. Por kemi të bëjmë me një sistem të tërë që nuk funksionon. Unë kam një vit që mundohem të monitoroj të gjitha institucionet që janë përgjegjëse për sigurinë ushqimore, Ministria e Bujqësisë, AKU apo edhe institucione të tjera dhe shoh që këto institucione nuk ekzistojnë në këtë aspekt. Patjetër që ka një përqasje me të lartë në këto muajt e fundit, në gjysmën e dytë të vitit që të jenë më aktivë në marrëdhëniet me publikun, por kjo pas denoncimeve tona. Por prapë çedojnë shumë në funksionet e tyre të kryerjes së detyrave. Gjatë këtij viti janë dhjetëra e dhjetëra raste që lidhen me produktet tona të cilat kthehen në kufijtë e Bashkimit Europian, për përmbajtje të pesticideve apo lëndëve të palejuara.

Rasti i mandarinave është një rast që mori me shumë publicitet, apo pak më shumë pasqyrim. Por rastet janë të pafundme. Rastet që unë denoncova i përkisnin vetëm periudhës së muajit nëntor – dhjetor, të cilat ishin raste ku produkte me elementë të dëmshëm u kapën nga sistemi i BE-së. Nuk është se ne i kapëm. Ne i kemi institucionet që të kapin të tilla raste dhe t’i evidentojnë dhe më pas t’i bllokojnë. Por edhe në rastet kur neve na njoftojnë strukturat partnere, në prapë çedojmë me reagim dhe në zbatimin e ligjit dhe në komunikimin e rrezikut, AKU e ka detyrim ligjor të komunikojë rrezikun për produktet të cilat qytetarët shqiptarë nuk duhet t'i konsumojnë. Ky është një sistem që lidhet me një sistem të tërë. Po të vini re dhe po të shikoni edhe buxhetin e këtij viti nga qeveria, nuk ka asnjë buxhet të shtuar. AKU me dijeninë time nuk ka asnjë laborator të certifikuar që t’i përpunojë sa më shpejt të dhënat dhe të asistojë fermerët.

Fermerët kanë nevojë për ndihmë, për asistim, kanë nevojë për subvencionim. Sidomos ata që prodhojnë produkte shumë të mira ushqimore. Në asnjë moment, Ministria e Bujqësisë është komplet e shkëputur nga ky zinxhir. As nuk i kontrollon, as nuk i subvencionon dhe as nuk u jep ndihmë që ata të bëjnë produkte sa më të mira. Çka do të thotë që ne duhet të jemi shumë të kujdesshëm në gjithçka që mund të ushqehemi. Dhe kjo nuk mjafton. Pasi shpeshherë disa produkte që ne i marrim për të mira, siç ishte rasti i mandarinave, del që paska përmbajtje të pesticideve të ndaluara tashmë në Bashkimin Europian”, u shpreh Muçollari./ CNA