E fundit!

12:01 Aktualitet

“Jam një i vdekur që ecën”/ Zbardhet dëshmia e Pëllumb Gjokës në GJKKO për dosjen “Metamorfoza”

Këtë të enjte ka dëshmuar në Gjykatën e Posaçme një nga sh...

Rritje e tregut të automjeteve të reja, por klientët po i blejnë direkt

12 Tetor 2025, 14:02, Aktualitet CNA

Rritje e tregut të automjeteve të reja, por klientët po i

Ndonëse tregu i automjeteve të reja mbetet tepër i ulët në vend, shitjet e makinave me zero kilometrazh po shënojnë rritje vit pas viti.

Por, viti 2024 tregoi një orientim drejt blerjeve direkte, duke anashkaluar koncesionarët.

Kjo ka bërë që një pjesë e tyre të shënojnë rënie të të ardhurave në 2024-n.

Sipas të dhënave nga DPSHTRR, regjistrimet e automjeteve në total u rritën ndjeshëm. Në vitin 2024 u regjistruan për herë të parë 99.4 mijë automjete, ose 27% më shumë nga viti i mëparshëm. Nga këto 83 mijë ishin autovetura, me rritje 26% nga 2023.

Tregu vijon të dominohet nga automjetet e vjetra. Nga 83 mijë autovetura të importuara, vetëm 12% e tyre kishin një vit prodhimi 0-4 vjet. Gati 80% e autoveturave të regjistruara për herë të parë në 2024 kishin një vit prodhimi mbi 9 vjet.

Nga totali i autoveturave të regjistruara, vendin e parë e zë “Volkswagen”, me 24.2%, e ndjekur nga “Mercedes Benz” me 17.5% dhe “Audi”, me 12.8%.

Rritet interesi për automjetet e reja

Tendenca e blerjes së automjeteve me zero kilometrazh po vjen në rritje të shpejtë vitet e fundit. Në 2024-n u regjistruan për herë të parë 13873 mjete të reja, me zgjerim prej 44% në krahasim me vitin e mëparshëm.

Pesha e mjeteve të reja të regjistruara për herë të parë arriti në 13.9% të totalit, nga 12.3% që ishte vitin e mëparshëm. Të dhënat bëhen të ditura në databazën e Drejtorisë së Përgjithshme të Shërbimeve të Transportit Rrugor.

Pjesa më e madhe e automjeteve hyjnë direkt nga importi, por edhe koncesionarët ose shitësit e autorizuar po e përmirësojnë pjesën e tyre në treg. Në 2024-n, nëpërmjet koncesionarëve u regjistruan 24.4% e mjeteve gjithsej, me një rritje nga 21.75% vitin e mëparshëm.

Gjithsej, në 2024-n, nëpërmjet koncesionarëve janë regjistruar 24.3 mijë mjete, me rritje 43% me bazë vjetore. Edhe te koncesionarët, mjetet e përdorura zënë peshën kryesore, me 85% të totalit.

Blerësit e mjeteve të reja preferojnë në pjesën më të madhe që t’i marrin direkt nëpërmjet importit dhe nuk kalojnë nga koncesionarët. Nga 13.9 mijë mjete të reja, vetëm 27% kaluan nëpërmjet koncesionarëve.

Tregu është nxitur dhe nga turizmi, që ka shtuar kërkesën për automjete të reja nga shoqëritë që i japin me qira dhe ato të taksive. Këto të fundit janë zgjeruar ndjeshëm së fundmi, duke investuar në flota elektrike.

“Mektrin Motor” realizoi të ardhura prej 4.3 miliardë lekësh, me rritje 13.6% me bazë vjetore duke u ngjitur në vend të parë.

Sipas raportit të aktivitetit, ndikimin kryesor në ecurinë e aktivitetit e kanë dhënë: Rënia e të ardhurave nga shitja e pjesëve të këmbimit; rritja e të ardhurave nga shitja e automjeteve; rënia e të ardhurave nga shërbimet; rritja e shpenzimeve për paga, amortizimeve, të tjera operacionale dhe e interesave financiare.

Shitjet e automjeteve kanë sjellë 89% të të ardhurave, pjesa tjetër ka ardhur nga pjesët e këmbimit dhe riparime e mirëmbajtje.

Kompania thekson në raport se është përballur me rritjen e çmimeve të shërbimeve për realizimin e shitjeve.

Kjo ka sjellë vështirësi në menaxhimin e kostove dhe realizimin e shitjes deri te klienti.

“Porsche Albania”, raportoi të ardhura prej 4.1 miliardë lekë në 2024-n. Sipas të dhënave të detajuara në bilanc, 92% e të ardhurave vijnë nga tregtimi i automjeteve të reja.

Si të ardhurat nga shitja e makinave të reja, ashtu dhe të përdorura, ishin në rënie në vitin 2024.

Rreth 90% e qarkullimit është gjeneruar nga automjetet e pasagjerëve dhe pjesa tjetër, nga automjetet e punës.

Gentian Bushati, menaxher i përgjithshëm i kompanisë pohon se “nga dy marka në vitin 2005, sot kompania përfaqëson pesë marka të Grupit Volkswagen, duke ofruar një portofol të plotë dhe të diversifikuar për tregun vendas.

Në vitin 2013, tregut shqiptar iu bashkua edhe Porsche Leasing, duke e bërë Porsche Albania të vetmin distributor me filozofinë “One Stop Shop” për klientët.

Këto hapa kanë konsoliduar rolin e kompanisë në treg dhe kanë krijuar një bazë të qëndrueshme për zhvillimin e mëtejshëm”.

“Tyres Group Albania” është një kompani që rritet me shpejtësi, duke raportuar të ardhura prej 4.1 miliardë lekësh në vitin 2024, me zgjerim prej 62%.

Sipas raportit të aktivitetit, kompania ushtron aktivitetin e saj në fushën e tregtimit me shumicë dhe pakicë të gomave, të të gjitha llojeve, për të gjitha llojet e automjeteve dhe ka qendër servisi për riparimin dhe mirëmbajtjen e gomave për të gjitha llojet e automjeteve.

Shoqëria ka si objekt dhe ushtrimin e aktivitetit privat në fushën e biznesit “Duty Free Shop”, nëpërmjet importit dhe tregtimit të mallrave që tregtohen në këtë rrjet.

“Kadiu” ka rritur të ardhurat me 7.2%, në 3.3 miliardë lekë. Sipas raportit të aktivitetit “edhe gjatë këtij viti është bërë një punë e mirë menaxheriale në rritjen e numrit të klientëve duke marrë parasysh edhe konkurrencën me të cilën përballet ky sektor.

Gjatë vitit 2024, shoqëria ‘Kadiu’ SH.A. ka vazhduar të rrisë edhe shitjet duke bërë që personeli të shënojë një rritje të numrit të punonjësve në 342, në krahasim me 313 të vitit të kaluar”.

“Auto-Pasion” kishte aktivitet me rritje 9%, me të ardhura prej 3.1 miliardë lekësh. Kompania pohon në raportin vjetor se “gjatë vitit 2024 kemi rritje me afro 10% të numrit të klientëve, në krahasim me 2023”.

“Albanian Motor Company” raportoi të ardhura prej 3 miliardë lekësh, me një tkurrje prej 25% me bazë vjetore.

Sipas raportit të aktivitetit, “Albanian Motor Company” është përfaqësuesja zyrtare dhe ekskluzive e markës “Ford”. Nga janari 2020, kompania është përfaqësuesi zyrtar i makinave “Hyundai”.

Nga janari 2022 është përfaqësuesi zyrtar i makinave “MG”, kurse në vitin 2023 mori përfaqësinë e shitjes të makinave “Cher”.

“Autostar Albania” raportoi të ardhura 2.9 miliardë lekë, me rënie prej 7.4% me bazë vjetore. Sipas të dhënave në bilanc, rreth 64% e të ardhurave ishte nga shitja e automjeteve të reja dhe pjesa tjetër, nga shërbimet, pjesët e këmbimit dhe qiradhënia.

“Auto Master” raportoi të ardhura prej 2.1 miliardë lekësh, me zgjerim 20% në 2024-n, pas rritjes me 40% vitin e mëparshëm. Ecuria pozitive është nxitur kryesisht nga zhvillimi i tregut të makinave me qira afatshkurtër, e ndikuar nga ecuria e mirë e sektorit të turizmit./ Monitor