E fundit!

14:51 Aktualitet

Pas më shumë se 5 orësh, Igli Tare del nga SPAK

Ish-futbollisti i Kombëtares shqiptare të futbollit, Igli ...

Rritja e çmimit të naftës shtrenjton biletat ndërqytetëse

6 Prill 2026, 15:40, Aktualitet CNA

Rritja e çmimit të naftës në vend ka sjellë një efekt zinxhir edhe në transportin publik ndërqytetës. Me naftën që ka arritur deri në 225 lekë për litër, drejtuesit e linjave kanë reflektuar këtë kosto duke rritur çmimin e biletave për qytetarët.

Nëse pak ditë më parë një udhëtim nga Korça drejt Tiranës kushtonte rreth 1400 lekë, sot qytetarët paguajnë 1600 lekë. Një rritje që, sipas udhëtarëve, rëndon ndjeshëm buxhetin e tyre të përditshëm, veçanërisht për shtresat më të ndjeshme si pensionistët.

“Jam pensionist dhe marr një pension mesatar. Vajtje-ardhje paguajmë 16 mijë lekë të vjetra. Si mendoni ju, mirë është kështu? Është shumë e vështirë, sidomos për ne pensionistët”, shprehet një nga pensionistët.

“Shtrenjtë më duket. Me çfarë do ta përballojmë? Unë jetoj në fshat, mallrat vijnë të gjitha nga jashtë. Është shumë e vështirë, nuk përballohet”, thotë një tjetër.

Qytetarët shprehen se përballimi i kostove po bëhet gjithnjë e më i vështirë, ndërsa rritja e çmimeve nuk ndalet vetëm tek transporti, por prek edhe produktet e përditshme.

“Është e vështirë sidomos për ne pensionistët. Të udhëtosh sot me 16 mijë? Duhet të marrësh edhe më shumë para me vete, se s’dihet çfarë bëhet nesër. Po jetojmë me sakrifica”, shprehet qytetari.

Ndërkohë, të tjerë qytetarë theksojnë se përgjegjësia nuk bie vetëm mbi drejtuesit e mjeteve, por kërkojnë ndërhyrje nga institucionet për të stabilizuar çmimet.

“S’ka faj edhe shoferi, ai e merr naftën shtrenjtë. E ka në dorë shteti, ai duhet ta ulë naftën. Ne nuk i përballojmë dot këto çmime”, thotë qytetari.

Sipas tyre, situata ekonomike është bërë e papërballueshme, sidomos për familjet me të ardhura të ulëta, ndërsa krahasojnë çmimet edhe me vendet fqinje, ku karburantet rezultojnë më të lira.

“Pensionet janë minimale. Me rritjen e karburanteve janë rritur edhe produktet ushqimore. Nuk e përballojmë dot, duhet të ndërhyjë shteti”.

Rritja e çmimit të karburanteve po vijon të ketë ndikim të drejtpërdrejtë në jetën e përditshme të qytetarëve, duke shtuar presionin mbi ekonomitë familjare dhe duke e bërë edhe më të vështirë përballimin e kostove bazë të jetesës. Në një kohë kur çmimet vijojnë të rriten, qytetarët kërkojnë masa konkrete për të lehtësuar barrën ekonomike, ndërsa transporti mbetet një nga shpenzimet më të ndjeshme për ta. /CNA