E fundit!

14:51 Aktualitet

Video- Pas më shumë se 5 orësh, Igli Tare del nga SPAK-u

Ish-futbollisti i Kombëtares shqiptare të futbollit, Igli ...

Replika në distancë/ Rama i kundërpërgjigjet sërish Fevziut

10 Janar 2026, 09:30, Aktualitet CNA

Replika në distancë/ Rama i kundërpërgjigjet sërish

Replikat vijojnë në distancë mes kryeministrit Edi Rama dhe gazetarit Blendi Fevziu.

Sipas Ramës, Blendi Fevziu ka gënjyer publikun nga ekrani i emisionit "Opinion" për deklaratat e tij se ministrat teksa ndodhen jashtë shtetit lënë kasetat e regjistruara sikur janë në punë.

Kryeministri i është kundërpërgjigjur duke thënë se Fevziu duhet t’i kërkojë një ndjesë publikut të tij.

Reagimi i Ramës

PRA, BLENDI FEVZIU KA GËNJYER FORT, kur duke e parë në sy publikun nga ekrani i "Opinionit" ai tha, “kam fakte që të paktën 7 ministra janë në udhëtime private jashtë shtetit të shtunave e të dielave, dhe lënë kasetat me inspektime nëpër TV sikur janë në punë… Jua garantoj!”

Duke reaguar ndaj postimit tim pa sjellë asnjë fakt mbi këtë akuzë të rreme ose shqip, shpifje, Fevziu braktisi jo thjesht deklarimin e dhënë me garancinë se zotëronte fakte, për plot 7 ministra, që sipas tij bënin marifetin e lartpërmendur. Në të vërtetë ai braktisi publikun e tij dhe u mor në tym me videot e inspektimeve, përballjet e Trump-it me gazetarët, lirinë e tij për të udhëtuar në Amerikën Latine, gjëra që s’kishin asnjë lidhje me arsyen e me përmbajtjen e reagimit tim.

Pa asnjë pendesë për fajin e tij live ndaj publikut, Fevziu u shfaq i çuditur që unë reagova ndaj shpifjes së tij, për të cilën ai në fakt mirë mua, që s’më detyrohet asnjë shpjegim, po publikut të "Opinionit" duhet t’ia kërkonte një ndjesë për gënjeshtrën me 7 bishta.

Dhe për të shpjeguar çudinë e vet, ai tha se gjëra më të mëdha duhet të merrnin vëmendjen time, duke filluar nga “1/3 e Shqipërisë nën ujë” - vendi ynë ka 2,874,800 hektarë nga të cilat uji kishte mbuluar 13,160 hektarë, pra jo 1/3 po 1/217 - apo duke vazhduar me “krizën parlamentare të shkaktuar nga kërkesa e SPAK-ut”, kur në fakt kriza parlamentare e Blendit është thjesht krizë e partisë së liderit të Fevziut dhe çunit të Bahri Falliut, sepse parlamenti është me pushimet e dimrit.

Por unë nuk çuditem që Fevziu nuk i kërkon ndjesë publikut të tij për gjithë atë derr gënjeshtre absurde dhe denigruese, ndaj njerëzish që Fevziu nuk ka detyrë t’i respektojë si kundërshtarë, po ka detyrimin të mos i baltosë kolektivisht duke nxitur urrejtje. Nuk çuditem as që i zoti i "Opinionit" propagandon kundër qeverisë, me të njëjtat marzhe të llahtarshme gabimi në komunikimin e fakteve, si ai i Shqipërisë së mbuluar nga uji në 1/3 - e këtu Fevzo s’është as vetëm, as më i gabuari, po të kesh parasysh ca të tjerë që gënjejnë si derra të knaqun migjenianë ditë e natë.

Nuk çuditem nga asnjë çudi e mexhlisit politik e mediatik unë, sepse më shumë sesa të vërtetës që Blendi e synon kur shkruan libra si gazetar, Fevziu i "Opinionit" i shërben tenxheres së tij të potershme që duhet të bubullojë përnatë, e të gërrgërrojë sa më fort mes 700 tenxhereve simotra, që ziejnë në një garë të marrë se kush shkumëzon më shumë.

Poterja gjithçka, e vërteta asgjë. Asnjë çudi.