Regjistrimet në universitetin e Korçës/ Rektori Ekonomi jep detaje për fazën e parë

17 Shtator 2024, 12:26, Aktualitet CNA

Regjistrimet në universitetin e Korçës/ Rektori Ekonomi jep

Rektori i universitetit "Fan Noli" të Korçës, Lorenc Ekonomi, ka folur rreth përfundimit të fazës së parë të regjistrimeve. Sipas rektorit, vihet re një rritje e vogël e studentëve të regjistruar, ndonëse thuajse në të njëjtat kuota, megjithatë për Ekonomin kjo është pozitive duke marrë parasysh edhe lëvizjet demografike.

"Në përfundim të fazës së parë kemi thuajse të njëjtin numër regjistrimesh madje pak më shumë se vitin e kaluar. Ajo që mund të vërejmë është se ky numër erdhi si rezultat i regjistrimeve të ditëve të para ku janë edhe studentët që kanë mesataret më të larta. Janë 381 studentë të regjistruar kundrejt 375 që ka qenë vitin e kaluar, pra jemi thuajse në të njëjtat kuota, por mund të konsiderohet mirë duke marrë parasysh edhe lëvizjet demografike që ndodhin në mënyrë të vazhdueshme."

Teknologjia e informacionit, financa, infermieria, sportet si edhe dega e inxhinierisë kompjuterike që u hap për herë të parë këtë vit, janë degët më të preferuara deri më tani.

"Në përgjithësi ka regjistrime në të gjitha degët. Degët më të preferuara janë ato të teknologjisë së informacionit, inxhinieria kompjutetike që hapëm këtë vit si rezultat i kombëtarizimit që bëmë me universitetin politeknik, financa, infermieria, sportet, dhe degë të tjera. Presim regjistrimet e fazës 2 dhe 3 dhe më pas të konkludojmë me vendimet tona që do t'i marrim në fund. Ka interes edhe në programet dyvjeçare."

Sa u përket studentëve, rektori ka treguar se pjesa më e madhe e tyre janë nga juglindja, ndërsa sa u përket programeve me pak regjistrime, Ekonomi shprehet se është herët për ta thënë se cilat janë ato, por konfirmon se të gjitha programet kanë studentë të regjistruar.

"Studentët kryesisht janë nga juglindja, dikur ka qenë më e përhapur gjeografia por tani mbetemi brenda qarkut, shumë pak janë nga jashtë Korçës. Është herët për të thënë cilat programe kanë pak regjistrime, ajo që konfirmoj është se të gjithë kanë regjistrime."

Në përfundim të fazës së parë të regjistrimeve në universitetin "Fan Noli" të Korçës, duket se të gjitha programet janë përzgjedhur nga studentët, të cilët kanë arritur në shifrën e 381 të rinjve. Pritet që gjatë fazës të dytë e të tretë, do të ketë prurje të tjera e më pas, drejtuesit e këtij institucioni do të marrin edhe vendimet konkrete sa u përket të gjitha programeve të studimit në këtë universitet./ CNA