web counter
LEXO PA REKLAMA!

SHKARKO APP

App Store
Google Play

E fundit!

x

Nxjerrja e sekretit hetimor për grupin "Çopja"/ BKH-ja sekuestron telefona

17 Shtator 2024, 10:44, Aktualitet CNA

Nxjerrja e sekretit hetimor për grupin "Çopja"/ BKH-ja

BKH ka marrë telefonat e Drejtorit të Policisë së Elbasanit dhe dy drejtuesve të policisë në këtë qark, pas rrjedhjes së informacionit për arrestimet e grupit "Çopja".

SPAK ka dyshime se mund të kenë nxjerrë sekretin hetimor para se të ekzekutohej vendimi i gjykatës.

Arratisja e Çopjave dhe shumë emrave të tjerë që ndodheshin në atë vendim për t’u arrestuar, ka angazhuar prokurorin Behar Dibra, i cili njëlloj si me rastin e gazetarit Elton Qyno, ka vendosur të hapë një hetim për “nxjerrjen e sekretit hetimor”.

Agjentët e BKH-së kanë marrë telefonat dhe këqyrur e-mailin një zyrtari tjetër të lartë të Policisë së Shtetit, i cili ia kishte dërguar me e-mail vendimin e gjykatës disa prej drejtuesve të Forcës Operacionale.

Punonjësve të policisë që u ka shkuar ky e-mail i dërguar nga zyrtari i lartë në drejtorinë qendrore, u janë marrë telefonat dhe këqyrur adresat postare elektronike, me shpresën e gjetjes së personit që kishte nxjerrë informacionin, përpara se SPAK-u të ndizte dritën jeshile për ekzekutimin e vendimit.

Prokuroria e Posaçme ka vënë në sitë në sitë 10 agjentë të policisë dhe Byrosë Kombëtare të Hetimit që kanë qenë në terren për ekzekutimin e masave të sigurisë të lëshuara në kuadër të operacionit që goditi bandën e vëllezërve Çopja në Elbasan. SPAK ka sekuestruar edhe telefonin e drejtorit të Policisë së Elbasanit, Ilir Proda.

Ky i fundit është kandidat zyrtar për zëvendësimin e Muhamet Rrumbullakut. SPAK ka marrë në pyetje edhe 3 drejtues policie që kanë patur dijeni për operacionin.

Lidhur me bindjen që ka organi i procedurës penale, është duke kryer verifikime në një sërë aparatesh celulare të personave të mësipërm, komunikime apo takime të mundshme kompromentuese.

Nga 33 urdhër arreste të miratuara nga Gjykata e Posaçme, me kërkesë të SPAK, u ekzekutuan vetëm 13, dy prej tyre të arrestuar më herët për vepra të tjera penale. Për disa prej këtyre shtetasve që sot janë në arrati, kishte të dhëna që ndodhen në Shqipëri, por me dyshimet se janë informuar nuk është arritur të kapen.


Një hetim i nisur prej vitit 2022 ndaj vëllezërve Franc dhe Hajdar Çopja nga Elbasani, iniciuar dhe nga dëshmitë e bashkëpunëtorëve të drejtësisë Erion Alibej e Nuredin Dumani, ka çuar SPAK në zbardhjen e disa vrasjeve, atentateve e grabitje.

Franc e Hajdar Çopja dyshohet të jenë krerët e grupit kriminal që fshihet pas vrasjeve si pasojë e përplasjeve mes grupeve, me qëllim sundimin e trafikut të kokainës në Europë.  E konkretisht bëhet fjalë për përplasjen mes grupit Çopja dhe Alibej./ CNA





Lajmet e fundit nga