E fundit!

08:12 Politikë

“I shari shan, i mençuri mendon”/ Rama ndan mesazhin e qytetarit

Kryeministri Edi Rama ka ndarë në rrjetet sociale postimin...

"Qeveria ka nisur turin me daulle e fanfara"/ Këlliçi: Rritja e çmimeve po rëndon qytetarët

31 Mars 2026, 12:15, Aktualitet CNA

"Qeveria ka nisur turin me daulle e fanfara"/ Këlliçi:

Deputeti i PD-së, Belind Këlliçi, ka reaguar ashpër ndaj situatës ekonomike në vend, duke akuzuar qeverinë për propagandë dhe mungesë masash konkrete për përballimin e rritjes së çmimeve.

Deputeti deklaron se, ndërsa qeveria promovon turin e saj, qytetarët përballen me vështirësi në përballimin e produkteve bazë ushqimore.

Ai solli shembuj nga tregje në qytete si Shkodër dhe Korçë, ku, sipas tij, çmimet e ushqimeve janë rritur.

Sipas Këlliçit, pensionistët janë ndër më të prekurit, duke theksuar rastin e një qytetareje që, për shkak të të ardhurave të ulëta, mund të blejë vetëm produkte bazike si kastravec, qumësht dhe kos.

Ai shtoi gjithashtu se shumë qytetarë po kalojnë kufirin për të blerë ushqime dhe karburant në Malin e Zi dhe Maqedoninë e Veriut, për shkak të çmimeve më të ulëta, pavarësisht kostove të udhëtimit.

Në deklaratën e tij, Këlliçi kritikoi edhe procesin e integrimit europian, duke akuzuar qeverinë dhe kryeministrin Edi Rama për pengimin e tij.

Në përfundim, ai u bëri thirrje qytetarëve të reagojnë dhe të marrin pjesë në protestën e paralajmëruar më 17 prill, duke e cilësuar këtë si një detyrim qytetar përballë situatës aktuale.

“Ndërkohë që qeveria ka nisur me daulle e fanfara turin, për punët e mëdha që ka kryer, në ato pak media të lira u shfaqën qytetarë, pensionistë në tregjet e vendit, nga Shkodra në Korçë, të cilët nuk blinin dot domate dhe speca.

Një kg domate 380 lekë, një kg speca, 400 lekë.

Një zonjë u shpreh se merr vetëm kastraveca, qumësht dhe kos. Kaq mund të përballojë me pensionin e saj.

Mijëra ikin çdo ditë nga kufinjtë për tu furnizuar me naftë e për të blerë ushqime në Mal të Zi e në Maqedoninë e Veriut. Pra ja vlen dhe kostoja e udhëtimit, madje dhe lodhja.

Dikush nga jashtë që sheh këto pamje e dëgjon këto dëshmi, mund të mendojë: A ka qeveri ky vend, nëse ka, a ka marrë masa?!

Qeveria ishte duke u mburrur me integrimin, kur dihet mirë se Brukseli e ka ndaluar procesin, pas vendimit të Edi Ramës për të mbrojtur korrupsionin me vota në Kuvend.

Qeveria ishte duke mbushur ekranet me punët për Shqipërinë… punë imagjinare!

Edhe sa do ta durojnë qytetarët këtë padrejtësi e tallje?

Reagimi, ngritja e zërit, nuk është më thjesht një e drejtë.

Eshtë një detyrim, një thirrje për vendin.

Në 17 prill, takohemi sërish në sheshin e protestës”, shkruan Këlliçi./ CNA