web counter
LEXO PA REKLAMA!

SHKARKO APP

App Store
Google Play

10 mijë euro grant për fermerët e rinj, rritet mbështetja për blegtorinë dhe bletarinë

31 Mars 2026, 10:46, Aktualitet CNA

10 mijë euro grant për fermerët e rinj, rritet mbështetja

Ministri i Bujqësisë, Andis Salla, ka prezantuar këtë të martë Skemën Kombëtare Mbështetëse për Fermerët, duke bërë të ditur rritjen e ndjeshme të fondeve dhe subvencioneve për sektorin bujqësor.

Në një konferencë për shtyp, ai u shpreh se skema është hartuar në bashkëpunim me fermerët në të gjithë vendin dhe synon të mbështesë investimet në sera, pemëtari, vreshta, blegtori, mekanikë bujqësore dhe agroturizëm.

Sipas ministrit, fermerët e rinj do të përfitojnë deri në 10 mijë euro grant, kryesisht për investime në blegtori. Ndërkohë, parashikohen edhe mbështetje të tjera konkrete:

-Deri në 3 milionë lekë për ndërtimin e staneve

-Rreth 500 mijë lekë për pajisje dhe makineri bujqësore

-Subvencione të rritura për sektorin e blegtorisë

Mbështetja për gjedhët rritet nga 10 mijë në 12 mijë lekë për krerë, për të imëtat nga 1200 në 1500 lekë, ndërsa për bletarinë subvencioni dyfishohet nga 1 mijë në 2 mijë lekë për koshere.

Aktualisht në vend numërohen rreth 600 mijë koshere, me objektiv arritjen e 1 milion deri në vitin 2027.

Skema parashikon edhe një subvencion prej 7 mijë lekësh për dosat, duke përfshirë kështu edhe sektorin e rritjes së derrit.

Nga kjo skemë përfitojnë fermat që plotësojnë kriteret minimale, si 5 lopë, 50 krerë të imëta, 25 koshere apo 5 dosa. Gjithashtu, mbështetje do të ketë edhe për kontrollin biologjik të dëmtuesve në sera, ku financimi arrin deri në 70% të kostos.

Skema përfshin edhe sektorin e akuakulturës, duke mbështetur rritjen e peshkut në ujërat e brendshme, si dhe fermerët me mbi 3 hektarë tokë, të cilët do të përfitojnë pagesë për çdo hektar të mbjellë.

Në fokus janë edhe shoqëritë e bashkëpunimit bujqësor, të cilat këtë vit do të mbështeten në masën 100%, si dhe fermat me prodhim organik të certifikuar./ CNA





Lajmet e fundit nga