web counter
LEXO PA REKLAMA!

SHKARKO APP

App Store
Google Play

E fundit!

x

Protesta e fermerëve në Korçë/ Apel qeverisë

22 Korrik 2024, 16:00, Aktualitet CNA
Protesta e fermerëve në Korçë/ Apel qeverisë
Fermerët në protestë

Dhjetëra fermerë të fushës së Korçës kanë protestuar mëngjesin e sotëm pranë kryqëzimit të fshatit Libonik. Një sërë problematikash shqetësojnë fermerët e fshatrave të Maliqit e Korçës, çka ka bërë që këta të fundit të marrin mjetet bujqësore e t’i vendosin anës rrugës hyrëse të fshatit Drithas, duke bërë që të bllokohej qarkullimi në këtë segment.

Shkaku i bllokimit të rrugës ka bërë që të ndërhyjë policia duke larguar protestuesit në një anë, ndërsa kjo ka sjellë edhe agravim të situatës duke bërë që të ketë edhe përplasje mes policisë dhe fermerëve. Në intervistat e dhëna për mediat, fermerët thonë se protesta e sotme u organizua për dy arsye. Së pari, ata tregojnë se prodhimet bujqësore si gruri, misri, qepa e patatja nuk kanë treg për t'u shitur dhe kjo ka bërë që të ngelen stok nëpër magazina.

"Unë jam fermere me potencial, operoj në fushën e fermës me kulturat grurë, qepë, patate. Ne na ka vajtur atje ku s'mban më, jemi të detyruar nga kushtet që po bëjmë këtë protestë. Kemi njoftuar të gjithë fermerët të cilët kanë ardhur këtu. Jemi të penalizuar nga prodhimi i Kosovës, Serbisë që na i sjellin këtu. Nuk shesim dot pataten, qepën e grurin. Gruri si asnjëherë tjetër është me 24 lekë\kg. Kostoja e grurit shkon mbi 30 lekë dhe ne që në shitje jemi minus. Me kulturën e patates dhe qepës na godet shumë Kosova sepse s'ka këto çmime që kemi ne, pasi subvencionohet me vlera më të mëdha se tonat."

Një tjetër arsye është importi i këtyre prodhimeve bujqësore nga vendet e rajonit, si Kosova, Maqedonia e Serbia. Ky import prodhimesh ka bërë që kostoja të rritet, ndërsa çmimi i shitjes të ulet së tepërmi.

"Ne po protestojmë se malli nuk po na ecën fare. Gruri ka shkuar me 170 lekë, patatja, qepa kanë rënë. Ne dalim për protestë paqësore për prodhimet tona, për fëmijët që t'i mbajmë, se s'kemi të ardhura të tjera, me çmimet e inputeve bujqësore që kanë vajtur në qiell. Me borxhe po i blejmë, nuk shitet se malli hyn nga jashtë, nga Kosova, Serbia. Gjynah policët se shefi i madh po i shtynte dhe thoshin 'ç'të bëjmë'. Do marrim këmbët tona e të ikim në shtëpi. Qeveria të ndalojë për një periudhë të shkurtër të paktën importin."

Fermerët drejtojnë apelin kundrejt instancave përkatëse për të kthyer sytë nga problematikat e tyre, duke filluar me ndalimin e importit të prodhimeve nga jashtë e deri te subvencionimi i inputeve bujqësore.

"Qeveria duhet të vërë dorë se ne këtu e kemi lidhur jetën. Jemi moshë që këtu duam të punojmë, të gjitha të ardhurat i kemi këtu. Patate, qepë, kam lopë, qumështi 500 lekë, patatja 200 lekë, qepa 200 lekë (të vjetër). Duam të hamë, të mbajmë familjen. Pse nuk shitet prodhimi këtu? Se hyn nga jashtë. Pse duhet të vijë policia këtu se ne s'po bëjmë ndonjë gjë."

Vitet e fundit problematikat e fermerëve të juglindjes janë shtuar më tepër se vitet e kaluara, ndërsa kjo situatë po shkon sipas tyre drejt falimentimit. Një investim mjaft i lartë që arrin qindra miliona lekë për këta fermerë, ndërsa nga ana e qeverisë nuk është marrë asnjë masë në subvencione. Fermerët paralajmëruan në këtë protestë se në rast neglizhence të kërkesave të tyre, ata do të ndërmarrin të tjera tubime duke bllokuar edhe akset nacionale me mjetet e tyre bujqësore./ CNA





Lajmet e fundit nga