web counter
LEXO PA REKLAMA!

SHKARKO APP

App Store
Google Play

Procesi gjyqësor ndaj ish-krerëve të UÇK-së/ KASH: Po deformohet realiteti historik i luftës së Kosovës

10 Shkurt 2026, 18:03, Aktualitet CNA

 

Procesi gjyqësor ndaj ish-krerëve të UÇK-së/ KASH: Po

Këshilli i Ambasadorëve Shqiptarë kanë dalë me një reagim për zhvillimet e fundit në procesin gjyqësor ndaj ish-krerëve të UÇK-së në Hagë.

Në deklaratë thuhet se ky proces, në formën që po merr, rrezikon të deformojë realitetin historik dhe juridik të Luftës së Kosovës.

Më tej, thuhet se ky proces rrezikon të amnistojë përgjegjësinë historike dhe politike të udhëheqjes shtetërore serbe për krimet e kryera në Kosovë

Deklarata e plotë:  

Këshilli i Ambasadorëve Shqiptarë shpreh shqetësimin e tij të thellë lidhur me zhvillimet e fundit në procesin gjyqësor që po zhvillohet në Hagë ndaj krerëve të Ushtrisë Çlirimtare të Kosovës.

Ky proces, në formën dhe narrativën që po merr, rrezikon seriozisht të deformojë realitetin historik dhe juridik të Luftës së Kosovës. Lufta çlirimtare e popullit të Kosovës ishte një reagim i ligjshëm dhe i domosdoshëm ndaj një fushate sistematike shtetërore të dhunës, spastrimit etnik dhe krimeve të luftës, të ushtruara nga regjimi i Sllobodan Millosheviçit , një regjim tashmë i dënuar moralisht dhe juridikisht nga komuniteti ndërkombëtar.

Çdo përpjekje për të barazuar agresorin shtetëror me viktimën që luftoi për mbijetesë dhe liri, përbën një fyerje jo vetëm për popullin e Kosovës, por edhe për vetë ndërhyrjen ndërkombëtare të Perëndimit, e cila u ndërmor pikërisht për të ndalur krimet e luftës dhe gjenocidin në zemër të Evropës.

Ky proces i deformuar rrezikon, në mënyrë të papranueshme, të relativizojë dhe madje të amnistojë përgjegjësinë historike dhe politike të udhëheqjes shtetërore serbe për krimet e kryera në Kosovë. Një zhvillim i tillë do të ishte një padrejtësi e rëndë historike dhe një precedent i rrezikshëm për të drejtën ndërkombëtare.

Këshilli i Ambasadorëve Shqiptarë riafirmon mbështetjen e tij për drejtësinë ndërkombëtare të paanshme, por thekson se drejtësia nuk mund dhe nuk duhet të shkëputet nga e vërteta historike dhe konteksti i plotë i ngjarjeve.

Çlirimi i Kosovës ishte akt legjitim i një populli të shtypur, dhe Ushtria Çlirimtare e Kosovës mbetet një forcë çlirimtare, jo objekt i revizionizmit politik apo juridik. /CNA





Lajmet e fundit nga