LEXO PA REKLAMA!

SHKARKO APP

“Pllaka mashtruese, të zhytura në pellgje uji dhe balte”/ Si është katandisur një nga rrugët më të frekuentuara të kryeqytetit

4 Dhjetor 2022, 14:07, Aktualitet CNA
“Pllaka mashtruese, të zhytura në pellgje uji dhe balte”/
Foto ilustruese

Gazetari Ermal Mulosmani ka ngritur shqetësimin për një nga rrugët më të frekuentuara të kryeqytetit, rrugën “Myslym Shyri”.

Në një postim ai ka evidentuar se si është katandisur rruga, duke vënë në dukje pllakat që lëvizin, që mbushen me ujë dhe baltë në mot të keq.

Sipas gazetarit rruga “Myslym Shyri” është treguesi se sa i vlerëson bashkia këmbësorët, shumicën e banorëve të Tiranës!

Postimi i plotë i Ermal Mulosmanit

Rruga “Myslym Shyri” është një nga më të bukurat e Tiranës. Po ta shikosh nga sateliti, sigurisht. Me trotuare të gjera, pemë anash dhe plot dyqane, duket e tillë. 

Ah, nëse ju bie rasti ta bëni në këmbë, ditëve me shi, është një toturë pllaquritje, me pllaka mashtruese të zhytura në pellgje uji e balte që këmba ime e pafajshme i kthen në ujëvara pisllëku që përplasen me këmbën tjetër e të futen në palcë! Është e kotë çdo tentativë për tu ruajtur! Isha me sytë poshtë, me shpresën se do të shpëtoja ç’të mundja nga një driblim inteligjent pllakash por përfundova i dorëzuar plotësisht pas 100 metrash!

Nja tridhjetë pllaka të puthitura në dukje, të përzgjedhura me kujdes nga ana ime, më shpërblyen në shatërvane uji që më nxorën nga shpirti sharje të vetmevetshme që shastisën kalimtarët. Ndërkohë, korsia e biçikletave, nja 2 m e gjatë dhe pa asnjë çiklist në të, ma bënte me sy! Aty nuk kishte pllaka që lëshonin stërpikë deri në Kashar por asfalt i ngjyrosur që të joshte  Doja të futesha në të por e dija se do çudisja dynjanë! Ndonjë çiklist që mund të vinte do më shihte si pronari ekskluziv i asaj korsie, ndërsa unë si ndonjë humbameno të sapombërritur në metropol! Ashtu i bërë qull i dola në krye i betuar që për asnjë arsye nuk do e kaloja më atë rrugë në kohë me shi! Isha me çadër, me këpucë me qafa, dhe përfundova i bërë qull! Mallkova shtetin e biçikletave, Bashkinë e propagandës dhe punëmbaruarit mashtrues që na shesin sapunin për djathë!

Rruga Myslym Shyri është  treguesi sesa i vlerëson Bashkia këmbësorët, shumicën e banorëve të Tiranës!

Edhe diçka në fund. Ajo rrugë e bukur e ka nënvlerësimin qysh në fillim fare. Emri iu vu në nderim të një ish hamalli I cili iu bashkua lëvizjes Nacionalçlirimtare në vitin 1942 si partizan në çetën e Pezës.  U vra në një betejë në Dibër. Kaq mund të lexoja për të pas kërkimeve. Si është e mundur që rrugës kryesore të Tiranës t’i vihet emri i një figure kaq periferike?! Ia vuri Enver Hoxha me propozim të Myslym Pezës në vitin 1969. Aso kohe rrugët e Tiranës numëroheshin me gishta. Absurde më duket!

Meqë është edhe kohë fushate le ta fillojnë punën nga kjo rrugë.

Lajmet e fundit nga