Përplasje në Komisionin e Ekonomisë/ Braçe 'gozhdon' Krifcën, 10 pyetjet për ministren

8 Nëntor 2022, 13:18, Aktualitet CNA

Përplasje në Komisionin e Ekonomisë/ Braçe

Foto ilustruese

Në Komisionin e Ekonomisë, ka pasur debat mes deputetit të Partisë Socialiste, Erion Braçe dhe ministres së Bujqësisë, Frida Krifca.

Braçe i është drejtuar Krifcës me 10 pyetje në lidhje me bujqësinë duke nisur nga eksportet dhe buxheti për të mbështetur bujqit.

Braçe-Sa është sipërfaqja me tokë të punuar gjatë këtij viti? Sa është sipërfaqja me tokë të papunuar gjatë këtij viti?

-Sa është prodhimi bujqësor në sasi dhe vlerë, sa është prodhimi blegtoral në sasi dhe vlerë dhe sa është prodhimi nga sektori i peshkimit në sasi dhe vlerë?

-Sa janë eksportet në sasi e vlerë, të paktën për 9-mujorin e këtij viti. Eksportet bujqësore, blegtorale dhe nga prodhimi prej peshkimit, të gjitha në sasi e vlerë?

-Niveli i përpunimit të prodhimeve bujqësore në sasi e vlerë? Prodhimeve blegtorale në sasi dhe vlerë? Përpunimi pra?

-Sa është nevoja referuar dhe këtij viti për ujitje, në sasi uji, ndërkohë, sa është kapaciteti sot në metër kub që ne kemi për ujitje?

-Sa është buxheti për mbështetje të drejtë buxhetore për bujqit në 2022-shin dhe po prapë në vitin 2023. Referuar shifrave që u dhanë këtu, sa është mbështetja për fermë që ne paguajmë në 2022-shin, mesatarisht dhe sa do jetë kjo për vitin 2023.

-Sa është vlera e paguar për naftën deri tani, në 2022-shin dhe sa do të jetë vlera që ne do të paguajmë për naftën gjatë 2023-shit.

-Sa të punësuar me pagesë, ditore, javore, mujore, ka sot në bujqësi, blegtori, peshkim e përpunim?

-Sa është e ardhura mesatare e një punëtori sot në bujqësi, blegori, peshkim e përpunim?

-A ka bujq apo zotërues fermash, që janë debitorë kundrejt ministrisë së bujqësisë? Nëse po, sa është vlera?

Ministrja Krifca është përgjigjur duke thënë se të dhënat që ka kërkuar deputeti do të jenë në dispozicion para se të mbyllet viti 2022.

Braçe vijoi më tej me debatin duke thënë se në bazë të pyetjeve që bëri do të pasqyrohej edhe angazhimi i Minsitrisë dhe institucioneve të tjera.

'Besoj se përgjigjet e pyetjeve që kërkova do pasqyronin angazhimin e Ministrisë dhe institucioneve të tjera… Pyeta për sa tokë punohet sot në Shqipëri dhe sa tokë nuk punohet sot në Shqipëri? Pasi kam dëgjuar një iniciativë lidhur me tokën e papunuar dhe natyrisht nëse shkohet në iniciativë ligjore pa të dhëna konkrete, sipërfaqja e tokës së punueshme është dinamike, është sipas ciklit të prodhimit, sipas stinëve dhe sipas nevojës dhe duhet të jetë dinamikë e një pune të përditshme.

Pyeta për prodhimin bujqësor, e blegtoral, peshkimin, pasi lidhet dhe me nevojën e konsumit brenda vendit, sidomos kur çmimet për mishin dhe peshkun brenda kanë një peshë të konsiderueshme në inflacionin që të gjithë qytetarët shqiptarë po paguajnë.

Pyeta për eksportet bujqësore, blegtorale, peshkimi e agropërpunimi, pasi është një kontribut i jashtëzakonshëm për tregtinë e jashtme. Sa kohë që çmimet në të gjitha tregjet janë rritur, pse të mos marrim dhe ne një pjesë të të ardhurave nga këto çmime të rritura', tha Braçe./ CNA.al