E fundit!

13:47 Live Updates

Karburantet në Shqipëri/ Një krizë besimi mes çmimeve dhe transparencës

Çmimet e karburantit sot dhe roli i sh...

Pemët dekorative, mundësi e re zhvillimi për Dajçin/ Kryeplaku i zonës kërkon mbështetje dhe subvencione

1 Dhjetor 2025, 13:16, Aktualitet CNA

Zona e Dajçit në Shkodër e njohur për tokat e saj pjellore dhe klimën e favorshme, po shfaqet gjithnjë e më shumë si një zonë me potencial të lartë për kultivimin e bimëve dhe pemëve dekorative.

Tom Pjetrani, kryeplaku i fshatit, i cili prej 15 vitesh merret me pemë dekorative, shprehet se tregu është i hapur, dhe pemët po eksportohen kryesisht në Itali.

Megjithatë, ai thekson se ngritja e një aktiviteti të tillë kërkon investime të konsiderueshme, ndërkohë që mungesa e infrastrukturës dhe problemi i vaditjes mbeten sfidat kryesore.

“Ka qenë një vit i mbarë për pemët dekorative. Kanë punuar të gjithë fermerët. Sa i përket blegtorisë apo bujqësisë, Dajçi është drejt eliminimit te blegtoria dhe janë duke u marrë të gjithë me pemë dekorative sepse janë çmimet që nuk ia vlen për t’u marrë me blegtori, ndërsa me pemë dekorative kanë punuar shumë. Tregu kryesor është në Kosovë, Itali, Serbi, Mali i Zi, Maqedoni e Veriut dhe Greqi. Rreth 60% e popullsisë së Dajçit merren me pemë dekorative, pra ata pak banorë që kanë mbetur merren me fidanishte, pemët që mbjellin në natyrë. Unë kam 50 dynym të mbjellur, kam edhe sera që bëjnë fidanin për treg dhe interesa të mia. Kam 15 vite që merrem, ndërsa për 20 vite kam punuar me bulmet, tani jemi fokusuar te pemët dekorative sepse kanë të ardhura më të mira. Sipas tij, tokat e zonës janë tejet kultivuese, por politikat e shtetit ndër vite kanë ndikuar në shpopullimin e Dajçit, duke shtuar ndjeshëm emigrimin”, është shprehur Tom Pjetrani, kryeplaku i fshatit Dajç.

Pjetrani është shprehur më tej se shteti duhet të mendojë edhe për subvencionimet.

“Mund ka sepse mungon fuqia punëtore. Pjesa më e madhe kanë ikur jashtë dhe po ikin përditë. Janë politikat që po i bëjnë të ikin njerëzit. Zona jonë është e mrekullueshme, e ka bekuar Zoti, si me natyrë, si me tokë, me gjithçka. Të rinjtë ikin për një jetë më të mirë. Shteti duhet të mendojë për subvencionimet. Ka disa firma të reja që kanë nisur punë dhe nëse ndihmohen është gjë e mirë sepse duhen të ardhura të mëdha për të hapur një biznes sepse kjo punë ka shumë mund. Kjo bimë ku jemi ne kërkon 4-5 vite për t’u bërë gati për treg dhe fuqia punëtore është shumë shtrenjtë dhe ka pak njerëz. Nëse vendos dorë në këtë zonë është gjë e mirë. Ne kemi problem edhe vaditjen, ne jemi në mëshirë të Zotit. Ne na rrethon uji, na mbyt uji dhe nuk kemi ujë. Për vaditjen dikush ka bërë shpime dikush në mëshirë të Zotit. Kjo e vështirëson sepse po të ketë ujë një impiant del një vit më herët sepse bimët duan ujë”, tha ai.

Sot, pemët dekorative përbëjnë 60% të të ardhurave të zonës, duke qenë një prej burimeve më të rëndësishme të ekonomisë lokale. /CNA