web counter
LEXO PA REKLAMA!

SHKARKO APP

App Store
Google Play

E fundit!

x

Mazhoranca propozon Denar Bibën dhe Eldian Ballën si kandidatë për në Komisionin e Konkurrencës

31 Mars 2026, 19:32, Aktualitet CNA

Mazhoranca propozon Denar Bibën dhe Eldian Ballën si kandidatë

Mazhoranca në Kuvendin e Shqipërisë ka vendosur të propozojë për postin e anëtarit të Komisionit të Konkurrencës, që pritet të mbajë edhe detyrën e kryetarit, kandidaturat e Denar Bibës dhe Eldian Ballës.

Mazhoranca ka propozuar dy kandidatura alternative, por, sipas burimeve nga Kuvendi, besohet se kandidati i përzgjedhur për t’u votuar përsëri në krye të Autoritetit të Konkurrencës do të jetë Denar Biba.

Në prezantimin e kandidaturës së tij para Komisionit Kuvendor për Financat, Ekonominë dhe Punësimin, kryetari aktual, Denar Biba, vendosi theksin te puna e bërë për forcimin e institucionit dhe kërkoi mbështetjen për vazhdimësinë e konsolidimit të mëtejshëm të tij.

Në vizionin e tij për të ardhmen, ai përmendi si objektiva kryesorë mbylljen e kapitullit VIII e procesit të integrimit në periudhën 2026-2027, transformimin e institucionit nga polic i tregut në partner të ekonomisë kombëtare dhe zhvillimit dhe projektimin e instrumenteve ligjorë analitikë dhe specifikë të ekonomisë dixhitale.

Kandidati Eldian Balla vjen nga bota akademike, me përvojë në mësimdhënie universitare, kërkim shkencor dhe menaxhim të marketingut në sektorin privat. Prej tetorit 2010, ai është është lektor me kohë të plotë në Universitetin “Aleksandër Moisiu”, Fakulteti i Biznesit.

Në prezantimin e tij para Komisionit, ai vendosi theksin te nevoja për qasje proaktive, nëpërmjet analizave dhe monitorimeve të vazhdueshme për tregjet strategjike. Ai gjithashtu theksoi rëndësinë e forcimit të dimensionit analitik në vendimmarrje dhe forcimin e ndërgjegjësimit të publikut mbi rregullat e konkurrencës.

Shpallja e vendit vakant në Komisionin e Konkurrencës u bë në fund të muajit janar, në prag të përfundimit të mandatit të anëtarit dhe kryetarit aktual, Denar Biba.

Kriteret kryesore për kandidatët në proces është që të jenë shtetas shqiptarë, të kenë vjetërsi pune në profesion jo më pak se 15 vjet dhe të jenë, prej jo më pak se 5 vjetësh, pjesëtarë të trupit akademik universitar ose të mbajnë titullin apo gradë shkencore në fushën e ekonomisë ose të drejtësisë, në specialitetin “E drejtë civile/ administrative”, si edhe të mos jenë larguar nga puna ose nga shërbimi civil me masë disiplinore.

Sipas ligjit, anëtarët e Komisionit të Konkurrencës zgjidhen nga Kuvendi. Një anëtar propozohet nga Presidenti i Republikës, dy anëtarë propozohen nga Këshilli i Ministrave dhe dy anëtarë propozohen nga Kuvendi.

Ligji parashikon që anëtarët e Komisionit zgjidhen me shumicë votash, në prani të më shumë se gjysmës së të gjithë anëtarëve të Kuvendit të Republikës së Shqipërisë, për një periudhë 5-vjeçare. Mes tyre, Kuvendi i Shqipërisë emëron edhe Kryetarin e Komisionit./Monitor.al





Lajmet e fundit nga