web counter
LEXO PA REKLAMA!

SHKARKO APP

App Store
Google Play

E fundit!

x

Kush po i sulmon prokurorët e SPAK-ut?!

8 Janar 2024, 12:33, Aktualitet CNA
Kush po i sulmon prokurorët e SPAK-ut?!
Fotomontazh - Prokurorët e SPAK-ut

Prokurorët e SPAK-ut nuk janë shenjtorë, ata nuk janë më pak mëkatarë se njerëzit e tjerë, kjo jo thjesht dhe vetëm në punën e tyre.

Edhe prokurorët kanë jetuar në atë shoqëri që ka kaluar tranzicion të gjatë korrupsioni dhe krimi, veçanërisht prokurorët e SPAK-ut, Strukturës së Posaçme që shihet tashmë si institucioni më shpresëdhënës në vend, shihet si ndryshimi i madh.

Kur te qeveria nuk ka më besim pas gati 11 vitesh në pushtet dhe konsumi është normal, kur tek opozita e përçarë nuk ka sinjale shprese se mund të sjellë ndryshim, atëherë një strukturë me prokurorë, ku brenda është një amalgamë e ndryshme karakteresh, si në SPAK, ka këndvështrimin bindës te shumica e shqiptarëve se mund të sjellë diçka të re.

Prokurorët nuk janë shenjtorë, mes tyre ka edhe fajtorë. Mund të ketë mëkatarë, por ka edhe tinëzarë gabues, të qëllimshëm ose jo.

Janë sulmuar ashpër në disa fronte, i sulmon mazhoranca nëpërmjet mediave të saj, nëpërmjet njerëzve të saj, me gjobaxhinj të blerë, nëpërmjet fituesve të koncesioneve apo duke tentuar të mbrojë zyrtarët e saj.

I sulmon opozita, duke pretenduar se nuk ka hetime të plota se ka një hakmarrje ndaj lidershipit të PD-së së Sali Berishës.

I sulmojnë mediat, mediat e lidhura me krimin, të paguara prej tij, mediat e lidhura me korrupsionin, të paguara prej tij, i sulmojnë gjobaxhinjtë mediatikë.

Pra, për të analizuar sulmet e prokurorëve dhe për të dalë në një përfundim është mjaft e vështirë, megjithëse disa nga pikat e mësipërme e kthjellojnë ujin që turbullohet shpesh ndaj prokurorëve.

Rasti i fundit ka qenë ai i Mirel Mërtirit me sulmin ndaj prokurorit Klodian Braho, pas "trurit të inceneratorëve" në sulm janë hedhur marjonetat e tij dhe bashkisë Tiranë. Hall të madh duket se kanë, frikë, panik dhe lëvizje tipike mafjoze.

 

Kush po i sulmon prokurorët e SPAK-ut?!
Prokurori Klodian Braho

 

Mërtiri u shfaq nga arratia për të akuzuar një prokuror të SPAK-ut, i cili në fakt i kishte marrë të pandehur dhe e kishte dënuar gjykata me fakte dhe me prova bashkëjetuesen Stela Gugallja për inceneratorin e Elbasanit dhe gjithashtu kishte marrë Mirel Mërtirin nën akuzë si trurin e inceneratorit të Elbasanit dhe të Tiranës, apo skenaristin e skemës së inceneratorëve.

Pra, sulmi ndaj Brahos ishte një sulm mafioz kriminal, nga një person i akuzuar për korrupsion dhe krim.

Nga ana tjetër, Dritan Prençi, një tjetër prokuror, u sulmua. Nuk është më shenjtor apo i pamëkatë sesa Braho, por çuditërisht Mërtiri nuk e sulmon, megjithëse Prençi ka në dorë dosjen e inceneratorit të Fierit dhe të Tiranës.

 

Kush po i sulmon prokurorët e SPAK-ut?!
Prokurori Dritan Prençi

 

Nga opozita pretendohet se nuk i ka kryer mirë hetimet, nuk i ka dërguar deri në fund dhe për këtë kanë shfrytëzuar edhe një vendim gjykate, hetime të ngadalta dhe pa rezultat.

Dikush pretendon se Braho është nën kontroll, dikush tjetër thotë se Dritan Prençi paraqet forcën te një biznesmen i fuqishëm pranë pushtetit, dikush tjetër akuzon një tjetër prokuror e kështu me radhë, por gjithçka është një amalgamë, siç e theksuam më lart.

Shkojmë tek emra të tjerë, tek Edvin Kondili, i cili megjithëse prokuror i SPAK-ut, tentoi të nxirrte të pafajshëm Ilir Beqajn. As emrin nuk ia dërgoi në gjykim për çështjen e sterilizimit. E hetoi përciptazi.

Pa folur këtu më pas për prokurorë të tjerë si Arben Kraja, i cili në krye të SPAK-ut vonoi pafundësisht hetimet për inceneratorët.

Në qarqet politike dhe mediatike përflitej se ai kishte dhënë garancinë se dosjet do të mbylleshin. Gjithashtu, ka marrë nën akuzë Berishën. Fakti është se gjatë kohës së tij, në 3 vite nuk kishim rezultatet që ka SPAK-u në 6 muaj, çka tregon jo pak një “dështim” të tij në drejtimin e SPAK-ut.

Nga ana tjetër qëndron Altin Dumani, herë i sulmuar dhe herë i mbështetur.

Për më tepër dhe vetë njerëzit mediatikë të aferave korruptive të inceneratorëve dhe bashkisë Tiranë apo të skandaleve të tjera korruptive diku i drejtojnë tytën e sulmit, e diku i lëpihen duke tentuar intriga të vogla skemash dhe skenaresh në lidhje me bashkëpunëtorët e këtij të fundit.

 

Kush po i sulmon prokurorët e SPAK-ut?!
Kreu i SPAK-ut, Altin Dumani

 

Ka të tjerë prokurorë të SPAK-ut, siç është rasti i Behar Dibrës apo Eneid Nakuçit.

Ky i fundit u sulmua edhe nga “Top Channel” gjatë kohës që hetonte inceneratorin e Elbasanit, së bashku me Brahon. Të dy u sulmuan, arsyeja është mjaft e thjeshtë. “Top Channel” ka ortakëri me njerëzit e inceneratorëve, kanë dalë me dhjetëra fakte, dokumente që përfshijnë në aferë “Top Channel”-in dhe pronarët e tij.

Pra, gjithçka duet se është një përzierje e madhe interesash, që sulmet ndaj prokurorëve, apo akuzat ndaj tyre nga shumë të vërteta i bëjnë shumë të komplikuara, korruptive, të dirigjuara nga krimi apo sulme që vijnë nga politika për interesa të caktuara.

Ata prokurorë, nuk janë shenjtorë, janë mëkatarë, siç janë të ndershëm janë edhe të korruptuar.

Dikush mund të thotë se ka informacion për një prokuror apo për një tjetër dhe do ta sulmojë, do t’i publikojë faktet. Por lind pyetja: Pse këto sulme tani? Dhe përse nga ata që prokurorët i kanë në hetim? Mos vallë është kërkuar që t’u shërbejnë dhe ata nuk i kanë pranuar?

Shumë tension tek bashkia Tiranë dhe zarat e saj mediatikë që i paguan Mirel Mërtiri.

Rastet mund të jenë të ndryshme, por ajo e inceneratorëve është më flagrante. Ndaj duhet parë dhe analizuar thellësisht sjellja që kanë personat të cilët publikojnë, akuzojnë apo sulmojnë prokurorët.

Në rast se denoncimet janë të drejtpërdrejta, investigative, gazetareske dhe pa konflikte të pastra interesi, gjithçka është në të drejtën e medias, qytetarëve dhe këdo që i akuzon, por kur këto bëhen të përziera me krimin dhe korrupsionin janë akte mafioze kriminale. Dirigjohen nga zyrat e korrupsionit që i ka kapur paniku.

Kjo është kriminale. Në raste të ndryshme nuk ka më asnjë dyshim që akuzat dhe sulmet janë të ndryshme, por të dirigjuara diku tjetër me qëllime krejt mafioze./ CNA





Lajmet e fundit nga