E fundit!

11:00 Aktualitet

Vijojnë përplasjet në kantierin e aeroportit të Vlorës/ Kërkohet ndërhyrja e policisë, reagon Behgjet Pacolli

Vazhdojnë tensionet në kantierin e aeroportit të Vlorës. P...

Konflikti në aeroportin e Vlorës/ Përfaqësuesit e "Mabco": Gjykata nuk na ndalon, kemi kërkuar verifikim punimesh

20 Maj 2026, 11:15, Aktualitet CNA

Konflikti në aeroportin e Vlorës/ Përfaqësuesit e

Përfaqësuesit e kompanisë “Mabco” kanë zhvilluar një konferencë për mediet në lidhje me konfliktet e ndodhura ditët e fundit në aeroportin e Vlorës. Përfaqësuesja e kompanisë, Ornela Çuçi, tha se ky konflikt është jo thjesht një problem kompanish, por problem i funksionimit të shtetit.

Çuçi u shpreh se kompania “Mabco” nuk kërkon as konflikt, as polici, por thjesht të dorëzojnë një vepër të sigurt.

“Kjo që po ndodh nuk është thjesht një problem kompanish, është problem i funksionimit të shtetit ligjor. Gjatë gjithë kohës është krijuar akses, por situata jo vetëm nuk është zgjidhur, por dhe është përshkallëzuar. Nuk kërkojmë as konflikt, as polici. Kërkojmë thjesht t’u dorëzojmë qytetarëve një vepër të sigurt me rëndësi ndërkombëtare”, tha Çuçi.

Avokati Ili Gërdupi tha se nuk ka asnjë vendim gjyqësor që pengon punimet në aeroportin e Vlorës. Gërdupi u shpreh se VIA nuk është një kompani që jep urdhra, por një kompani bijë e “Mabco”-s. Më tej avokati tha se kërkesa është që të rikthehet legjitimiteti në VIA dhe të ndalohet përdorimi i akseve të kontestuara.

“VIA ka 98% të aksioneve, '2A Group' mban vetëm 2% të kuotave. Ka një dallim të madh mes bërjes së punëve dhe mbajtjes së kuotave. Çdo tranferim i kuotave kur janë shoqëri me subjekt koncesionar ka nevojë për miratime të ndryshme. Në këtë rast as nuk janë regjistruar. Në gusht 2025 'Mabco' u vu në dijeni të një kontrate transferimi, që nuk ishte bërë në asnjë moment me dije, pas verifikimit rezultoi një mashtrim i nënshkruar jo në mënyrë të rregullt, të nënshkruar jo nga personat e autorizuar. Po në këtë kontratë, gjykata dha një vendim ku pezulloi plotësisht kuotat. Vendim që u pezullua nga Apeli. Me këtë bllokim të kuotave, pavarësisht se gjykata thotë vetëm për të drejtën e votimit, por punimet për ndërtimin vijojnë dhe ka të drejtën të marrë dijeni për vendimet e asamblesë. Pra, nuk ka asnjë vendim gjyqësor që pengon punimet. VIA është vetëm një bijë e 'Mabco'-së, nuk është kompani që jep urdhra. Kërksa jonë është të rikthehet legaliteti në VIA, të ndalohet përdorimi i akteve të kontestuara”, u shpreh Gërdupi.

Inxhinieri Klodian Sava, i cili mban dhe postin e drejtuesit të kantierit, tha se kompania “Mabco” i ka përfunduar punimet gati 99%. Sava deklaroi se është kërkuar nga ana e tyre një verifikim nga autoritetet e pavarura për cilësinë e punimeve.

“Ne si kompani kemi përfunduar punimet gati në masën 99%. Që prej shtatorit 2025, në llogaritë e kompanisë kanë qenë rreth 6.54 mln euro të rimbursimit të TVSH-së, të parashikuara për blerje dhe instalim sistemesh që ende nuk janë blerë. Nuk ka pasur furnizim me energji elektrike dhe nga ujësjellësi.

Sistemet tona nuk mund të testohen nëse nuk kemi lidhje të energjisë elektrike. Një tjetër problematikë është operimi në të ardhmen e afërt i aeroportit. Përgjegjësia që i ka kaluar 'Mabco'-së, kemi kontaktuar aeroportin e Mynihut, por duke parë sulmet e paprecedenta kompania është tërhequr. Është kërkuar të bëhen disa plotësime në projekt, për të rritur kapacitetet e linjave ndërkombëtare. Gjë që ka sjellë kosto dhe kohë shtesë në realizimin e punimeve.

Jemi penguar gjatë instalimit të sistemit të sinjalistikës gjatë natës, por dhe kemi verifikuar problematika në zbatimin e punimeve nga '2A Group'. Kemi kërkuar një verifikim nga autoritete të pavarura për cilësinë e punimeve. Nga 'Mabco' në asnjë moment nuk ka vonesa apo pengues në hapjen e aeroportit. Është VIA që duhet të merret me pajisjet aeroportuale që t’i blejë dhe t’i vendosë në funksion”, tha Sava.