Komiteti i Përbashkët Shqipëri – Azerbajxhan/ Balluku njofton konkluzionet e mbledhjes, protokolli që u firmos

4 Maj 2023, 15:11, Aktualitet CNA

Komiteti i Përbashkët Shqipëri – Azerbajxhan/ Balluku

Zëvendëskryeministrja dhe njëherësh ministrja e Infrastrukturës dhe Energjisë, Belinda Balluku, ka marrë pjesë në mbledhjen e Komitetit të Përbashkët Shqipëri – Azerbajxhan, së bashku me ministrin e Energjisë të Republikës së Azerbajxhanit.

Balluku gjatë një deklarate është shprehur se në këtë takim është diskutuar për një linjë direkte midis dy vendeve.

Ndër të tjera, në këtë takim janë diskutuar edhe çështje dhe investime të tjera të rëndësishme si gazifikimi i Korçës apo ekspansioni i konsorciumit TAP dhe gazi i lëngshëm në portin e Triportit të Vlorës.

Më tej ajo theksoi edhe zhvillimin e mëtejshëm të marrëdhënieve mes dy vendeve në fushën e edukimit dhe agrokulturës.

“Pata kënaqësinë sot të kem në Tiranë Komitetin e Përbashkët midis Shqipërisë dhe Azerbajxhanit, për sa u përket zhvillimeve ekonomike, teknologjike dhe atyre industriale.

Me ministrin e Energjisë së Republikës së Azerbajxhanit ne kemi një bashkëpunim të hershëm për sa i përket të gjitha çështjeve energjetike dhe mbështetjeve që ne marrim nga Qeveria e Azerbajxhanit, por sot biseda qe mjaft konstruktive dhe Komiteti i krijuar dypalësh arriti në disa konkluzione që më pas u firmosën në një protokoll midis dy grupeve.

Duhet thënë që patjetër fusha energjetike është ajo që ka interesin më të madh midis dy palëve, duke pasur parasysh projektet e rëndësishme që kemi, si gazifikimi i Korçës apo ekspansioni i konsorciumit TAP, gazi i lëngshëm në portin e Triportit të Vlorës dhe shumë projekte të tjera të rëndësishme që ne prej kohësh i kemi komunikuar me publikun.

Por, nga ana tjetër edhe në fushën e agrikulturës, por edhe në fushën e edukimit dhe të kulturës u diskutuan gjatë të gjitha mënyrat se si mund të bashkëpunojmë nga shkëmbimi i eksperiencave dhe deri te mbështetja e ndërsjellët midis dy vendeve.

Ndërkohë duhet pasur parasysh që një tjetër fushë interesi midis dy vendeve tona është ajo e transportit, duke vënë në fokus kryesor në transportin e aviacionit civil. Pra, aviacioni civil ishte nga çështjet që diskutuam sot pasi një linjë direkte midis dy vendeve tona, midis dy kryeqyteteve Baku dhe Tiranës është një kërkesë e të dyja qeverive.

Duhet thënë që ky Komitet është ngritur në një moment shumë të rëndësishëm në vitin e 30-të, ne festojmë tashmë 30-vjetorin e marrëdhënieve diplomatike, e vendosjes së marrëdhënieve diplomatike midis Shqipërisë dhe Azerbajxhanit dhe në një moment kur marrëdhëniet tona janë shumë intensive dhe në kuadrin më të mirë të këtyre 30 viteve.

Unë do të desha t'i lë fjalën kolegun tim dhe patjetër ne në të ardhmen do të kemi mundësi që të adresojmë të gjitha ato hapa që do të hidhen, pasi me firmosjen e protokollit sot tashmë nis puna konkrete për realizimin e gjithçkaje që ndërmorëm dhe u angazhuam sot në tryezën e përbashkët”, tha ajo./CNA.al