web counter
LEXO PA REKLAMA!

SHKARKO APP

App Store
Google Play

E fundit!

x

Bosët e ‘djegësve’, të lidhur me "Ndragheta"-n?!/ "SYRI TV" siguron dosjen e Prokurorisë së Tiranës

4 Maj 2023, 11:26, Aktualitet CNA
Bosët e ‘djegësve’, të lidhur me
Foto ilustruese

"SYRI TV" ka siguruar ekskluzivisht letërporosinë e Prokurorisë së Tiranës, e cila kërkon informacione nga Prokuroria e Romës rreth dyshimeve për bashkëpunimin ndërmjet bosëve të inceneratorëve: Mirel Mërtiri, Klodian Zoto, Stela Gugallja dhe biznesmenit Ilir Dedja me organizatën mafioze Ndragheta. Hetimi i Prokurorisë së Tiranës ka marrë shtysë nga një hetim i prokurorisë së Padovës për të njëjtën çështje, dhe ngre dyshime serioze për përfshirjen e "Ndragheta"-s jo vetëm në pastrimin e parave në aktivitete të jashtëligjshme në Shqipëri, por edhe direkt në megaaferën e inceneratorit të Tiranës.

"SYRI TV" ka siguruar ekskluzivisht kërkesën e Prokurorisë së Tiranës drejtuar Prokurorisë së Romës, ku kërkohet informacion për disa shtetas, mes tyre Ilir Dedja, Stela Gugallja, Mirel Mërtiri, Klodian Zoto, Edvin Zeqja.

Prokuroria e Tiranës ka nisur procedim penal me numër 1206 në vitin 2020 me dyshimin e bashkëpunimit përmes pastrimit të produktit të veprës penale për llogari të organizatës mafioze, "Ndragheta".

Indiciet e këtij hetimi kanë nisur fillimisht nga një hetim i karabinierisë së Padovës në Itali, pikërisht për dyshimet e bashkëpunimit kriminal mes kompanive të hapura në Shqipëri dhe organizatës kriminale "Ndragheta". Letërporosia e Prokurorisë së Tiranës rezulton se është dërguar në datën 14 shkurt të vitit 2023, tri vite pas regjistrimit të procedimit penal.

Po ku qëndron lidhja e bosëve të inceneratorëve Mirel Mërtiri, Klodian Zoto dhe Stela Gugallja me shtetasin Ilir Dedja? Sipas letërporosisë së Prokurorisë së Tiranës, e gjithë zanafilla ka të bëjë me kompaninë "C.G.C." sh.p.k., të krijuar në tetor të vitit 2013, me administrator Mirel Mërtirin, aksioner Ilir Dedja me 30% dhe 70% kompaninë "Integrated Technology Service", në pronësi të shtetasit Klodian Zoto. Në vitin 2018, Stela Gugallja, bashkëjetuesja e Mirel Mërtirit, i ka shitur aksionet tek Ilir Dedja, i cili në vitin 2019 ka rishitur 70% të aksioneve kompanisë "Intergrated Technology Service" në pronësi të Klodian Zotos.

Po sipas kësaj letërporosie, qendra operacionale e EUROPOL-it informon se autoritetet italiane në datën 9 mars 2017, i kanë sekuestruar Klodian Zotos një shumë prej 22 mijë 560 eurosh.

Po a ka vazhduar bashkëpunimi mes Ilir Dedjës dhe Mirel Mërtirit edhe pas shitblerjes së aksioneve në kompaninë "C.G.C"?

Sipas investigimit të "SYRI TV", rezulton se shtetasi Ilir Dedja është pronar i kompanisë "3DDD Swiss Trading" me qendër në Lugano. Kjo kompani rezulton të ketë marrë nga korriku i vitit 2019 deri në shkurt të vitit 2021, 490 mijë euro pagesa për shërbime të paqarta nga kompania e inceneratorit të Tiranës "Integrated Energy BV SPV" sh.p.k., siç tregohet në këtë dokument të siguruar ekskluzivisht nga "SYRI TV".

Bosët e ‘djegësve’, të lidhur me

Prokuroria e Tiranës, në letërporosinë e saj drejtuar Prokurorisë së Romës nën dyshimet e bashkëpunimit të kompanisë së Ilir Dedjës, por edhe sa i takon rolit të shtetasve Mirel Mërtiri, Klodian Zoto dhe Stela Gugallja, kërkon të dijë:

1. Evidentin e aseteve të regjistruara në emër të këtyre shtetasve.

2. Transaksionet ekonomike të regjistruara në emër të këtyre individëve dhe personave juridikë.

3. Evidentimi i periudhave të qëndrimit të këtyre shtetasve në territorin italian.

4. Evidentimi i shumave të tjera të parave të sekuestruara nga autoritetet italiane për këta shtetas.

5. Të evidentohen vlerat e parave që këta shtetas mund të kenë depozituar në bankat në territorin italian.

6. Evidentimin e të dhënave kriminale për këta individë në territorin italian.

Kjo letërporosi tregon qartë se Ilir Dedja, Mirel Mërtiri, Klodian Zoto dhe Stela Gugallja janë nën hetim për bashkëpunim me grupin mafioz "Ndragheta", çka ngre dyshime edhe përfshirjen e mafias italiane edhe në skemën e pastrimit të parave përmes aferës së inceneratorëve.

"SYRI TV" tregon me fakte lidhjen e qartë të pagesave që janë bërë nga kompania e famshme e inceneratorëve me Ilir Dedjën, i cili po hetohet nga dy prokuroritë, ajo e Padovës në Itali dhe e Tiranës për pastrim të parave për llogari të grupit mafioz "Ndragheta". Njëkohësisht këto transaksione janë pjesë e dyshimeve të denoncuara prej vitesh nga opozita për pastrimin e parave që ortakët e inceneratorëve: Mirel Mërtiri, Klodian Zoto dhe Stela Gugallja kanë bërë me kompanitë e lidhura dhe që përmes kësaj skeme kanë zhdukur dhjetëra miliona euro të taksapaguesve shqiptarë për një shërbim që ata nuk e kanë marrë ende deri më sot.

Do të mjaftonte ky denoncim që Struktura e Posaçme Anti-Korrupsion të kërkonte transferimin e menjëhershëm të kësaj dosjeje nga Prokuroria e Tiranës për ta bashkëngjituar atë me hetimin paralel për megaskandalin e inceneratorëve. I takon SPAK-ut që të hetojë akoma më tej edhe rolin kontrollues të Bashkisë së Tiranës së drejtuar nga Erion Veliaj dhe Ministria e Energjisë së drejtuar nga Belinda Balluku, institucione, të cilat kanë detyrë funksionale të kontrollojnë se ku shkojnë paratë e taksapaguesve të Tiranës./ Syri.net





Lajmet e fundit nga