web counter
LEXO PA REKLAMA!

SHKARKO APP

App Store
Google Play

E fundit!

x

Këshilli i Lartë i Prokurorisë hap garën për kreun e ri të SPAK-ut

17 Shtator 2025, 09:37, Aktualitet CNA

Këshilli i Lartë i Prokurorisë hap garën për kreun e ri

Këshilli i Lartë i Prokurorisë ka hapur zyrtarisht garën për kreun e ri të SPAK-ut, siç ishte njoftuar pak ditë më parë nga ky institucion.

Këshilli i Lartë i Prokurorisë hap garën për kreun e ri

 

 

Altin Dumani u zgjodh në krye të kësaj strukture në muajin dhjetor 2022 dhe mandati 3-vjeçar përfundon më 16 dhjetor 2025.

Dumani është drejtuesi i dytë i SPAK-ut dhe pasoi në detyrë Arben Krajën, i cili qëndroi në detyrë deri në vitin 2022, kur u bënë zgjedhjet e reja.

Altin Dumani vendosi një standard të lartë në hetimin e shpejtë të disa prej dosjeve më të nxehta të krimit të organizuar dhe aferave korruptive të politikanëve të lartë.

Me aktet e forta dhe veprimet e pandalshme duke goditur krimin, kupolën e tij, por dhe politikën e korrupsionin, Dumani tregoi se me ndershmëri dhe duke zbatuar ligjin prokuroria mund të çojë në bankën e të akuzuarve edhe ata që quheshin "të paprekshmit".

Nën drejtimin e tij u hetua dosja e pasurisë së Erion Veliajt dhe skemat e pastrimit të parave përmes OJF-ve që drejtonte bashkëshortja e tij Ajola Xoxa. Veliaj u arrestua më 10 shkurt 2025 dhe mbi të rëndojnë 13 akuza për 5 vepra të rënda penale nga korrupsioni deri te fshehja dhe mosdeklarimi i pasurisë. Së bashku me të u arrestua edhe miku i tij, biznesmeni Elman Abule, i cili u la më pas "arrest shtëpie".

Bashkëshortja e tij, Xoxa, u la nga gjykata në "detyrim paraqitje" me 12 akuza, së bashku me 6 biznesmenët e lidhur me Veliajn të akuzuar për korrupsion aktiv.

Po ashtu nën drejtimin e Dumanit janë hetuar dhe janë goditur disa nga organizatat kriminale të trafikut të drogës dhe krimeve kundër jetës me shtrirje në disa vende të botës pas zbërthimit të aplikacionit të enkriptuar 'Sky ECC' si “Plumbi i artë”.

Një sërë krimesh u zbardhën pas dëshmisë së të penduarit të drejtësisë, Nuredin Dumani, përmes së cilës shkuan para togave të zeza disa nga eksponentët më famëkeq të krimit të organizuar në vend që operonin në Elbasan, Durrës dhe qytete të tjera, vlejnë të përmenden anëtarët e grupit të Talo Çelës.

Gara për kreun e ri të SPAK-ut që u hap sot pritet të jetë një garë e fortë me qëllim për të ruajtur standardet e arritura.

Sipas të dhënave që ka siguruar CNA nga burime të saj jozyrtare, janë katër emra që mund të garojnë për kreun e këtij institucioni.

Sipas burimeve, në garë pritet të futen prokurorët Adnan Xholi, Vladimir Mara, Klodian Braho dhe Anita Jella./CNA

 

 

 

 

 

 

 

 

 

 

 

 

 

 





Lajmet e fundit nga