Inceneratorët/ PD: Të ndërpriten pagesat nga Thesari i Shtetit për djegësit fantazmë, thirrja për SPAK-un

16 Gusht 2023, 11:25, Aktualitet CNA

Inceneratorët/ PD: Të ndërpriten pagesat nga Thesari i Shtetit

Partia Demokratike e Sali Berishës ka kërkuar nga Ministria e Financave të ndërpresë pagesat nga Thesari i Shtetit për inceneratorët fantazmë.

Përmes një deklarate për mediat, Dorian Teliti i ka bërë thirrje Prokurorisë së Posaçme që të thellojë hetimet dhe të gjurmojë milionat e eurove të paguara, me qëllim që të rikthehen në arkën e shtetit dhe në xhepat e taksapaguesve shqiptarë.

Deklarata e plotë e Dorian Telitit:

Prej vitesh nga kjo foltore kemi denoncuar afera korruptive dhe klienteliste të qeverisë qendrore dhe pushtetit vendor.

Abuzime me të drejtat e njeriut, me pronat e shqiptarëve, tenderë me një ofertë të vetme, rritjen pa kufi të barrës fiskale për bizneset dhe qytetaret, koncesionet me PPP e deri tek udhëtimet luksoze me charter.

Ndonëse vendi ynë prej dy dekadash ka një kuadër ligjor të plotë sa i takon menaxhimit financiar publik, dhe mbështetja e institucioneve ndërkombëtare, si FMN apo BB nuk ka munguar për të rritur kapacitetet e administratës për të menaxhuar sipas ligjit çdo qindarkë publike, disa gjakpirës të financave publike kanë ndërrmarë praktika antiligjore, duke shkelur me të katërta këmbët parimet e financimit të shpenzimeve publike.

Rasti më konkret është ai i inceneratorëve.

Janë plot 103 milionë euro të paguara për një shërbim që nuk është kryer, atë të incenerimit të mbetjeve.

Incenerimi, apo ndryshe djegia e plehrave, nuk është kryer, thjesht për faktin se një proces i tillë nuk kryhet nga koncesionari.

Ama paratë janë paguar sikur ky shërbim jo vetëm ekziston, por madje nuk është ndërprerë as edhe një ditë.

Ligji Organik i Buxhetit e ka të shprehur qartë se për të kryer një pagesë thesari duhet që kërkesa të jetë e shoqëruar nga dokumentacioni që vërteton kryerjen e shërbimit përkatës.

Nëse incenerim nuk ka, atëherë si është e mundur që të vërtetohet në dokumente një shërbim i tillë, përveç rastit kur dokumentet falsifikohen, apo zyrtarët e lartë të institucioneve firmosin në shkelje të ligjit për një punë të pakryer?

Si është e mundur që pagesat janë kryer nga Thesari i Shtetit, ndonëse të gjithë, i madh e i vogël, e dinë që incenerim nuk ka?

Si është e mundur që paska ende supervizorë kaq kurajozë që sfidojnë kaq hapur ligjin dhe organet e sistemit gjyqësor?

Si është e mundur që paska ende zyrtare të Bashkisë Tiranë dhe Ministrise së Infrastrukturë të cilët e kanë për detyrë monitorimin e zbatimit të kontratave koncesionare, të cilët vazhdojnë muaj pas muaji, prej vitesh tashmë, të firmosin fatura për miliona e miliona euro për diçka që nuk ekziston?

Këto nuk janë shqetësime që ne i ngremë sot, kemi vite që kërkojmë zbardhjen e së vërtetës.

Kemi vite që kërkojmë ndërprerjen e pagesave për inceneratorët.

Fatkeqësisht, edhe sot që flasim, jo vetëm që pagesat nuk janë ndërprerë, por kërkohet që të paguhen edhe detyrimet e prapambetura.

I bëjmë thirrje Ministrisë së Financave që të ndërpriten menjëherë pagesat nga Thesari i Shtetit për inceneratorët fantazmë.

I bëjmë thirrje SPAK-ut që të thellojë hetimin dhe gjurmimin e miliona eurove të paguara, me qëllim që të rikthehen në arkën e shtetit dhe në xhepat e taksapaguesve shqiptarë.

Të jesh në kërkim dhe drejtësia mos të gjejë dot, ndërkohë që miliona euro e gjejnë lehtë rrugën për te ti, përbën një shaka të trashë me publikun./ CNA