web counter
LEXO PA REKLAMA!

SHKARKO APP

App Store
Google Play

E fundit!

x

Garda pengoi gazetarët në punën e tyre/ "Safe Journalists", letër shqetësimi Kuvendit

18 Tetor 2024, 14:41, Aktualitet CNA

Garda pengoi gazetarët në punën e tyre/ "Safe

Rrjeti "Safe Journalists" i dërgoi një letër shqetësimi Kuvendit të Shqipërisë, për të shprehur shqetësimin e tyre në lidhje me veprimet e Gardës së Republikës më 17 tetor 2024, të cilat pasqyrojnë një model të përsëritur dhe shqetësues të pengimit të aksesit të gazetarëve dhe minimit të lirisë së medias.

Atë ditë gazetarëve që mbulonin zhvillimet parlamentare iu mohua aksesi nga Garda. Ata jo vetëm që u penguan të filmonin në hyrje, ku deputetët po vinin mes tensioneve të shtuara, por u ndalua edhe hyrja në vetë seancën plenare sipas raportimeve të gazetarëve dhe reporterëve.

Rrjeti "Safe Journalists" thekson se ky incident nuk është i izoluar, por pjesë e një modeli shqetësues, të përsëritur të kufizimit të aksesit të medias brenda Kuvendit të Shqipërisë. Incidente të ngjashme u dokumentuan nga Rrjeti i "Safe Journalists" gjatë vitit të kaluar, përfshirë më 9 tetor 2023, kur gazetarëve iu mohua qasja në ambientet parlamentare me arsyetime të paqarta. Incidente të tjera pasuan në vitin 2024.

Më 6 shkurt gazetari Ardit Hoxha u shty fizikisht dhe u largua nga Garda, duke e penguar të filmonte, më 17 maj, ekipeve mediatike u ndaluan të filmonin një takim me gazetarët e shkarkuar të RTSH-së, pavarësisht kërkesës formale dhe njoftimit publik; më 30 maj, gazetarët u penguan gjatë një seance plenare teksa Garda tentoi t’i largonte nga galeria. Së fundmi, më 3 tetor 2024, gazetarët u penguan fizikisht të hynin në zhvillimet parlamentare kur hyrja kryesore ishte mbyllur qëllimisht.

Rrjeti "Safe Journalists" i bën thirrje Kuvendit të Shqipërisë që ta trajtojë këtë çështje me urgjencën dhe seriozitetin që e kërkon, duke marrë parasysh shqetësimet e ngritura nga gazetarët. Rrjeti "Safe Journalists" shpreson që do të ndërmerren hapa të menjëhershëm për të krijuar një mjedis ku gazetarët mund të ushtrojnë të drejtën e tyre për të raportuar lirisht, pasi kjo është një shtyllë themelore e çdo shoqërie demokratike./CNA





Lajmet e fundit nga