web counter
LEXO PA REKLAMA!

SHKARKO APP

App Store
Google Play

“Furtuna Rrumbullaku”, mbi kokat e drejtuesve të policisë/ Strukturat që janë nën ethe

18 Shtator 2022, 11:54, Aktualitet CNA
“Furtuna Rrumbullaku”, mbi kokat e drejtuesve të policisë/
Drejtori i përgjithshëm i policisë, Muhamet Rrumbullaku

Drejtori i përgjithshëm i policisë, Muhamet Rrumbullaku, ashtu siç ka paralajmëruar më herët CNA.al, së shpejti do të prezantojë ndryshimet dhe lëvizjet e reja.

Megjithëse një ditë më parë ai deklaroi se nuk kishte prioritet ndryshimin e emrave në krye të strukturave qendrore e vendore, “furtunën” do ta nisë së shpejti.

“Prioriteti im nuk është ndryshimi i emrave në krye të strukturave qendrore e vendore, por ndryshimi i filozofisë dhe i metodologjisë së punës dhe për të arritur këtë duhen domosdoshmërisht reforma ligjore, strukturore dhe arsimore”, ka thënë një ditë më parë Rrumbullaku gjatë një takimi me prezantues oficerët ndërlidhës dhe përfaqësuesit e misioneve dhe programeve që asistojnë policinë e shtetit për përmbushjen e detyrave funksionale të saj.

Strukturat ku pritet të startojë “furtuna Rrumbullaku”, janë ato që merren me hetimin e krimit në përgjithësi, kryesisht me ato të krimit të organizuar.

“Synoj ndryshimin kryesisht të strukturave që merren me hetimin e krimit në përgjithësi dhe të krimit të organizuar në veçanti, si dhe krijimin e një strukture sa më efikase, me qëllim arritjen e rezultateve pozitive në këtë drejtim”, është shprehur Rrumbullaku.

“Furtuna” do të prekë edhe burimet njerëzore. Do të kalohet në filtër ecuria dhe karriera e çdo punonjësi policie, me qëllim emërimin.

“Gjithashtu, dua t'ju bëj me dije se do të ndryshojë mekanizmi i menaxhimit të burimeve njerëzore. Brenda pak ditëve, në policinë e shtetit do të konstituohen këshillat e shqyrtimit të propozimeve për emërimin në detyrë dhe ecurinë në karrierë të çdo punonjësi policie, praktikë kjo që do t'i japë fund vendimmarrjes së deritanishme që ishte atribut vetëm i drejtorit të përgjithshëm të policisë së shtetit, për të emëruar punonjës të policisë në detyrë në të gjitha nivelet”, ka njoftuar Rrumbullaku./CNA.al





Lajmet e fundit nga