web counter
LEXO PA REKLAMA!

SHKARKO APP

App Store
Google Play

Fronëzimi i Mitropolitit të Korçës, Anastas/ Të pranishmit dhe fjalimet e mbajtura

27 Shtator 2025, 19:18, Aktualitet CNA

Fronëzimi i Mitropolitit të Korçës, Anastas/ Të

Ditën e sotme, duke nisur që prej orës 11:00, në katedralen “Ngjallja e Krishtit në Korçë” u zhvillua ceremonia e Fronëzimit të Mitropolitit të Korçës, Hirësi Anastasit.

I pranishëm në ceremoni ishte Fortlumturia e Tij, Kryepiskopi i Tiranës, Durrësit dhe gjithë Shqipërisë, Joani. Gjatë fjalës së mbajtur, Fortlumturia e Tij ka dhënë mesazhe të forta. Një pjesë e fjalimit të tij i ishte dedikuar Korçës si qyteti i kulturës, djepi i arsimit, si qendër e rezistencës shpirtërore ku lindi Rilindja Kombëtare dhe u hap shkolla e parë shqipe.

Kryepiskopi Joan theksoi se sot si në të gjithë vendin tonë, edhe Korça përballet me sfida të mëdha si emigrimi masiv i të rinjve, plakja e popullsisë, vështirësitë ekonomike, ndikimi i sekularizmit, humbja e vlerave tradicionale dhe dobësimi i familjes, e cila është shtylla për të pasur një shoqëri të shëndetshme dhe funksionale.

Kryepiskopi shprehu bindjen se Mitropoliti i Korçës, Anastas, do të gjejë përgjigje krijuese për të gjitha sfidat e lartpërmendura.

“Në momentet e vështira, kujto thjeshtësinë dhe devotshmërinë e atë Kozmait, përulësinë dhe durimin e Hirësi Ignatit, diturinë dhe dashurinë e Kryepiskopit Anastas në veprën e tij të pashoqe në ringritjen e Kishës sonë nga gërmadhat. Por sidomos kujto fjalët e Apostullit: Unë mund të bëj gjithçka me anë të Krishtit që më forcon (Fil. 4:13), sepse pa Krishtin nuk mund të bëjmë asgjë (Jn. 15:5).

Nuk je vetëm - pas teje qëndron e gjithë Kisha jonë, Sinodi i Shenjtë, klerikët e nderuar dhe qindra mijëra besimtarë që do të luten për ty. Ki ndërmend gjithmonë se të është dhënë hiri i Perëndisë dhe se Perëndia nuk na ka dhënë frymë frike, por frymë force, dashurie dhe urtësie (2Tim. 1:7). Së bashku do të vazhdojmë detyrën e shenjtë që na është besuar.

Le të lulëzojë Mitropolia nën drejtimin tënd! Le të bëhet Korça qendër rrezatimi shpirtëror për të gjithë vendin tonë, model për të gjithë botën orthodhokse”, u shpreh Fortlumturia e Tij.

 

Të pranishëm në ceremoninë e Fronëzimit të Mitropolitit të Korçës, Hirësi Anastasit, ishin dhe anëtarët e Sinodit të Shenjtë të Kishës Orthodhokse.

Më 16 shtator 2025, Sinodi i Hirshëm i Kishës Orthodhokse Autoqefale të Shqipërisë, nën drejtimin e Fortlumturisë së Tij, Joanit, zgjodhi Hirësinë e Tij, Anastasin, Mitropolit të Korçës. Më parë, Hirësia e Tij ishte Episkop i Krujës.


Mitropoliti i Korçës, Anastasi, ka mbajtur sot fjalimin e tij të parë pas ceremonisë së Fronëzimit. Hirësi Anastasi tha se Fronëzimi është një ngjarje e kishës, një gur i ri i vendosur në tempullin e gjallë të trupit të Krishtit. Ai theksoi se ky vend që po i besohet nuk është i tij, por i Zotit.

“Etër të dashur, bashkëpunëtorët e mi më të afërt në vreshtin e Zotit, ju jeni zëri i përditshëm i kishës; praninë tuaj e ndien çdo lagje, çdo fshat e çdo shtëpi. Përmes jush predikohet Ungjilli, kremtohen misteret, dhe populli i Perëndisë ushqehet me hirin e shenjtë. Ju jeni duart me të cilat Krishti bekon, buzëqeshja me të cilën Bariu i Mirë ngushëllon, dhe zemra me të cilën ai i mbledh delet e Tij. Pa ju, çdo fjalë e imja do të ishte bosh, çdo përpjekje do të mbetej pa fryt. Për këtë ju falënderoj me gjithë zemër për gjithçka që keni bërë deri më sot", tha Mitropoliti i Korçës, Anastasi.

 

Po ashtu i pranishëm ishte dhe Atë Mihal Senellari, i Mitropolisë së Korçës. Në fjalën e tij Atë Mihali tha se kjo është një ditë e shenjtë për Mitropolinë dhe Hirësi Anastasit i dorëzohet shkopi baritor për të gjykuar me dashuri.

“I bekuar është ai që vjen në emrin e Zotit, një ditë e shenjtë për Mitropolinë tonë. Në emër të popullit u japim këtë shkop baritor për të gjykuar me dashuri”, tha Atë Mihali./ CNA

 





Lajmet e fundit nga